مافيش حاجة إسمها إديت مشاعرك للشخص الغلط أو إستهلكت مشاعرك في غير مكانها .. المشاعر مش متخزنة في علبة جواك و ليك مخزون معين بتنزل بيه من بطن مامتك و كل ما تاخد منه ينقص ، المفهوم دا غلط خالص ..
المشاعر و الحب عبارة عن حياة متجددة ، لما تحب حد بتتولد ليه مشاعر جواك من أول و جديد ، و لو الحب دا صح و هيكمّل بتلاقي المشاعر دي بتزيد ، مش بتقل و تُستهلك و تضيع ، بالعكس دي بتكبر و تنمو جواك أكتر ..
فمافيش حد بياخد حق حد من المشاعر ، و مافيش حاجة إسمها مشاعرك خلصت و مش هتعرف تحب تاني ، ولا خلاص فلان دا خد مشاعرك وطار بيها ، ولا أصل دا كان أول واحد فأخد أجمل مشاعر جوايا ، مش وش القفص هو يجي أول واحد ياخده ، اللي بيروح بيروح بالحب اللي إتولد جواك ليه ، بتاعه هو بس .. و اللي بيجي بيتولد ليه حب جديد ، ممكن يكون بطريقة و بصفات و أساليب و مشاعر تانية خالص غير الأولانية ، خاصة بالشخص دا بس .. فمافيش حاجة إسمها مشاعرك خلصت .. عادي ، هتحب تاني ..