[walaa farouk]

ربنا لما حب يصلح العلاقه بينه وبين بطرس اللي اتهزت من وقت ما انكره .. بعد قيامته راحله ف نفس المكان اللي اتقابلوا فيه أول مره .. ف المكان اللي شاهد علي أحلي ذكريات زمان .. سفينة بطرس .. بطرس ساعتها مكنش علي باله ان يسوع يجيله تاني .. فجأه لمح واحد جاي من بعيد .. يوحنا الحبيب هو اللي عرفه وقال لبطرس "هو الرب" .. وبعد ما اصطادوا السمك والشبكه اتملت علي أخرها واتغدوا سوا .. يسوع قعد مع بطرس علي جنب وسأله "بتحبني يا بطرس" .. سأله 3 مرات .. وبطرس رد عليه وقاله نعم يارب انت تعلم اني احبك ..
متهيألي عيون بطرس دمعت وقتها .. لما افتكر اجمل سنين عاشها مع يسوع .. وعدت قصاده كل ايام زمان كأنها شريط ذكريات
..
ربنا لما يحب يرجعك لحضنه تاني هيرجعك بالحاجه اللي بتفكرك بيه .. ب أيه كنت حافظها زمان .. ب صوره كل ما تشوفها بتحن لايامك معاه .. ب ترنيمه كنت بتحبها وانت صغير ..
يسوع حبيب مبيتغيرش .. هو بتاع زمان وبتاع دلوقتي .. وهو الحبيب اللي هيفضل بكره .. لو حتي الايام غيرتك و انكرته بدل المره 3 .. هو عمره ما بيتغير .. هيجيلك ف مكان اول مقابله بينكم واول حب .. ف سفينتك .. و هيسألك بعيون مليانه محبه وقلب ملهوف عليك : لسه بتحبني ؟! .. و ساعتها قلبك هينطق قبل لسانك وتقوله ما انت عارف يارب .. انت عارف اني بحبك 💝
#يسوع_مبينساش_الذكريات