[walaa farouk]

علبة الألوان مش كل لون فيها بيلبق ع التاني، مش عشان لون فيهم وحش، بالعكس
اللونين حلوين اوي بس كل واحد منهم بيلبق ع لون تاني بس دا "لأ"
نفس الفكرة في العلاقات
مش كل اتنين سابوا بعض لازم يبقى حد منهم "شيطان"
ممكن الاتنين حلوين جدا، بس زي اللونين اللي عمرهم ما هيلبقوا ع بعض
و وجودهم مع ألوان تانية "ناس" هتنورهم و تحييهم أكتر من وجودهم مع بعض

الخُلاصة :
مش من الضروري يكون في إجتماع خيرين "خير"
ولا من الضروري إن أي إفتراق يبقى طرف منه شر
كل الفكرة إن خيرهم مش لبعض و مش مع بعض ..

#اثبات_مالواقع
أعرف واحدة كانت مخطوبة لواحد و كانت بشكل ما تعلقت بيه
هو كان شخص كويس و هي كمان
كل الناس شايفاهم لايقين ع بعض، و يا بخته و يا بختها
بس الحقيقة إنهم كانوا عاملين زي الألوان اللي جمالها هيضيع و هيتطفى لو فضلوا مع بعض في لوحة واحدة،
رغم تعلُقها بيه أخدت قرار الإنفصال بكل قوة
قوة كدا مصحوبة بـِ إنهيار مؤجل
و قبل ما تنهي كل حاجة، اختارتله البنت اللي يكمل معاها، لفتت انتباهه ليها يعني
و انفصلوا، و بعدها بفترة خطب فعلا البنت دي
و بعدها بفترة تزوجها
و هنا هي إنهارت، ليه و إزاي
مش عشان ندمت بالعكس، عشان عارفة إن كان دا القرار الصح و اتأكدت
بس فكرة التوهة و الحيرة بإن طيب مين اللون اللي ربنا هيجمعني بيه في صورة واحدة كانت أكتر حاجة تعباها و مسيطرة عليها ..
مرت الأيام و ربنا رزقها و وهبها باللون اللي كمِّل و جَمِّل الصورة
و حمدت ربنا ع التوهة اللي سبقته
اللي هو المعنى الحرفي لـِ "لاقيته في كل اللي ضاع منها" ..