[Rena Jesus]

القطه العاميه:

- صدقني انا باحبه بجد وواثقه اني هاقدر اغيره .
- يامصيبه قلتلك مافيش راجل عينه زايغه بيتغير بعد الجواز الا نادر الا لما تحصله مصيبه وبعدين اشمعنا انتي اللي هاتقدري تغيريه !
-انا عارفه اني مختلفه كمان انا مش غيوره وسهل اتقبل العيب ده .
- حضرتك بتطفي النور بارادتك علشان تأكلي التفاحه الفاسده وبعد الجواز هاتنفجري وهافكرك .
- بس هو اختارني انا، طب ليه ؟
- كل اللي في حياته شايفين ان هو اختارهم ،
ولو اتجوزك انتي تبقي لانك الوحيده اللي ماخدش منها حاجه وبعد الجواز هايركنك في المطبخ ويعيش حياته.
- بس هو كان صادق واعترفي انه بيحب الستاتً ومش قادر يتغير .
-اولا هو مدمن ستات مش بيحبهم وكمان مش عايز يتغير ومبسوط كده وهايشتغلك ويقولك ساعديني اتغير ،
ثانيا اعترافه ده بقي موضه ، زمان كان الراجل يخبي ، دلوقتي بيتباهي علشان عارف عبطكم وفِي نفسك الوقت موافقتك اقرار انه يخونك براحته وانتي مش من حقك تعترضي لانه ماخدعكيش .
- بس انت ساعات بتنصح الزوجه تكمل مع زوج عينه زايغه .
- ماشي ماهي اتنيلت واتجوزته وغالبا مش بيبقي عندها بديل بسبب الحب والماده والولاد والشكل الاجتماعي ،
مش معقول هاطلق نص ستات البلد واشردهم علشان الرجاله الواطيه ،
- طب امتي الزوجه تكمل مع ابو عين زايغه؟

- الزوجه مش الحبيبه او الخطيبه ( سامعه ) في الحالات دي :
١- تكون عندها القدره علي التحمل مش بتستحمل وتكتم وتمرض وتموت .
٢-يكون فعلا عنده ضمير ونفسه يتغير والاهم يكون انسان محترم في كل حاجه
( كريم - حنين - راجل - جدع - بيحبها - ناجح- بيحترمها ويحترم اهلها- بيديها كل حقوقها النفسيه والجسديه والماديه )
بس ضعيف في نقطه الستات دي بس ، ساعتها وارد تغفرله وتتعايش معاه ، تزعل مره وتغضب مره وتفوت مره ، لحد ماربنا يقضي بينهم بالحق ،،
او أخو واحده منهم يأفشه معاها ويريحنا منه ومنك جتك مصيبه انتي وهو وهي وهما خنأتوني