[Rena Jesus]

كتير من الاقباط خرجوا ببوستات عنترية و للتحدي اننا جاهزين للشهادة و بالالاف حنروح البصخة ونملا الكنايس ومرحبا بالاستشهاد...
و مستنين تفجيرات الارهابين علي احر من الجمر و بسطنا الدنيا كده و كان الامر نزهة...!!!

اولا هذه الامنيات ربما نتمناها لانه استشهاد فجائي مباغت بدون تخيير او توقع الم ...
يعني و انا رايح الكنيسة مش في بالي اني حيتسفك دمي فبقيت شهيد بالصدفة ...

ثانيا لانه طريق يبدو سهل شكلا.. خبطة كده و خلاص لا جهاد و لا تعب...
في الحقيقة اتصور ان الامر سيختلف لو كان شكل الاستشهاد مش فجائي لكن اختياري زي ما كنا بنسمع عن القديسين الشهدا و تخييرهم في التمسك بالايمان او انكاره و الا العقوبة التعذيب و القتل..

اتصور لو تحول الامر لهذا الشكل ان هذه البوستات سينخفض عددها بشدة و انا اول هؤلاء ضعاف الايمان الذين نحتاج الي معونة سمائية تشجعنا و تثبتنا لان القصة لا عنترية و فرد عضلات و لا بالبساطة اللي بنقدمها ...

ياللي عاوز تتفجر في الكنيسة و تستشهد ..
عندك استعداد تقدم نفسك ذبيحة حية و تكسر ذاتك و تصالح اخوك و تستسمحه حتي لو كان غلطان في حقك ...
عندك استعداد تروحي تخضعي لحماتك او اخت جوزك و تغفري لها قسوتها و اساءتها عندك استعداد تسامحي جوزك علي خيانته ليكي ..

ياللي عاوز تتفجر و تقدم جسدك للمسيح عندك استعداد تنسي راحة جسدك في خدمتك و ابوتك لولادك ..
ياشباب ياللي في عنترية عاوز تقدم جسدك و دمك علشان يفجروك..
عندك استعداد تقدم نفس جسدك ده ذبيحة لربنا في انك تقاوم شهوتك و تحفظه هيكل نقي ليه...

نقيس علي كده حاجات كتير... الله يريد رحمة لا ذبيحة...
بلاش عنترية و اندفاع فنحن نحتاج الي ايمان حقيقي لم نختبر فعليا فيه...
فلا تهونوا الامر بسذاجة و لدينا اخوة مجروحين في اولادهم و من فقدوهم و من اصيب من عائلاتهم..
لا اتصور اني شخصيا ان استطيع تحمل مثل هذه الاوجاع و الضيق في بناتي او بيتي ان لم يعطني الرب معونة وسندا خاصا و نعمة فائقة فايماني هش

(جَرِّبُوا أَنْفُسَكُمْ، هَلْ أَنْتُمْ فِي الإِيمَانِ؟ امْتَحِنُوا أَنْفُسَكُمْ..ام لستم تعرفون انفسكم .) كورنثوس 2 - 13: 5

رؤية خاصة
نبيل شحاتة
ربنا يدينا حياة التوبة والاستعداد والجهاد .....
اكيد الاستشهاد ده اكليل مش لاي حد دول مختارين بالاسم