[Rena Jesus]

اتربينا ان الامومة تضحية و بس ..
ان الام تعيش عشان تشيل في هم كل اللي في البيت و بس..

اتربينا ان الست اللي تقول تعبت ناقصة عن غيرها كتير أوي رغم انها مش مقصرة في اي حاجة بس ازاي و ازاي تقول تعبت ؟!

اتربينا انك " مش اول واحدة تحملي "
" مش اول واحدة تولدي "
" مش اول واحدة تطّبق اول سنه من عمر البيبي من غير نوم "

اتربينا ان " اكتئاب بعد الولادة دلع فاضي " و ان مراتك كده مش وش نعمه و مبتتحملش مسئوليه !!

اتربينا ان عيب نقول اااه ، لازم نستحمل و نستحمل زي فلانه و علانة و لو عيطتي من الاجهاد و التعب تبقي غاوية نكد و قارفه جوزك...و حقه يبص بره !!

اتربينا ان اللي بتشيل اكتر حلوة حتي لو هي مش مبسوطة و لا مرتاحة ، في داهيه راحتها!!!

لأ..... كل ده مش منصف !! انتي انسان من لحم و دم !!
قولي انك مش قادرة و انك محتاجة مساعدة ..
قولي انك محتاجة تاخدي راحة دي حتي التلاجة بتفصل يا اما هيجيلها يوم تتحرق !!
اللي يقارنك بحد فا دي مشكلته مش مشكلتك ، مشكلته انه حاشر نفسه في اللي ملوش فيه ..

مش عشان تدلعي كل اللي في البيت تنسي نفسك !!
مش عشان ولادك يتبسطوا تنسي تفرحي نفسك بخروجة روقان نفسك فيها !!
مش عشان يلبسوا احسن حاجة تبقي مبهدلة و حاسه ان عمرك زاد خمسين سنه !!
نفسيتك هتتعب و هتحسي انك دايرة في ساقية ملهاش آخر ..
متحرميش نفسك من ابسط حقوقك و حقوق سنك و انتي لسه في عز شبابك ..
لمجرد انك أم..

الامومة عمرها ما كانت حرمان و تضحيات و شكراً..
و لا عمرها انك تنسي انك عايشة عشان ولادك و جوزك يعيشوا و هما مش ناقصهم حاجة ، عارفة ساعتها هيبقي ناقصهم ايه ؟؟
ناقصهم انتي... ضحتك...صحتك... نور وشك...حبك للحياه

عمر الامومة ما كانت حاجة تقصف عمرك ،
الامومة احلي حاجة في الحياه بس لو قررتي متدفنيش نفسك بالحياه و تدي لنفسك حقها زي ما بتدي كل اللي حواليكي حقهم ..
اوعي تنسي تعيشي