[Rena Jesus]

عندنا البنت من ساعة ما بتتولد و بيتولد جواها شعور دفين بالعار ..

فمن و هي صغيرة هي عار .. عار مينفعش يضحك ، يهزر ، يلعب مع باقي الأطفال ..
صوتها مينفعش يكون أعلي من طبقة معينة ..
حركات جسمها لازم تخلي بالها منها كويس ...
فبالرغم من أنها طفلة بريئة بس ممكن تثير راجل بالغ برجلها الواهنة الضعيفة أو ثديها الهزيل اللي لسه مبانش عليه اي علامات الأنوثة ..
فلو حصلها اي أذي او تحرش فهي مسؤولة أنها تعيش طول حياتها في سجن هذا العار !!

و بمجرد أنها تكبر شوية تتحول لعار أكبر ..
فكل خطوة بسيطة ممكن تسبب كارثة كفيلة بتهديد مستقبلها الكامل و مستقبل كل أفراد أسرتها !!
فهي عار لو صرحت باي فكرة حرة جواها أو تسألت عن راغباتها او أحتياجاتها كأنثي ...
عار لو قررت في اي لحظة تحب و تمارس مشاعرها بشجاعة و في النور ..
عار لو طالبت بوقت أكتر لتحديد شريك حياتها او تأجيل النقطة ديه لأنشغالها في موضوعات تافهة زي العمل و الدراسة .. !!!!

و تيجي لحظة نقل ملكية هذا العار من أب و أخ لزوج متحكم في تقرير مصير هذا العار !
مصيره النفسي و العقلي ، مصيره العملي و المادي ، مصيره الجسدي و حتي الجنسي !
فهو مسؤول مسؤولية كاملة بإخراجها حسب أهواءه الذاتية بسلطة المجتمع و العرف و الدين ....
و في حالة العصيان او الإعتراض تبقي زوجة عار ..
لو مقررتش ترضي و تعيش في سكات عشان بيتها و اطفالها تبقي أم عار ..
و لو قصرت في اي مسؤولية موكله ليها او معلمتش الأمر زي ما اتقال لها !
تبقي أنثي عار !
عار مبرر عقابه سواء بعقاب جسماني زي الضرب او الشتيمة أو عقاب حسي زي الإهمال او النفور ..

فلغاية ما تموت البنت هي كائن مفعول به .. كائن يمارس عليه ...
كائن غير متوقع منه الرد او حتي التفاعل ! ...
و اي أنثي تفكر او تتخيل انها ممكن تكسر القاعدة ديه تبقي بتحكم علي نفسها بوصمة مستديمة من العار ..