[walaa farouk]

ماكنتش اعرف يعنى ايه الواحد يشوف بقلبه ..
غير لما شوفت الصورة دى

الحكاية مش قصة ولد بيعيط ..
الحكاية مش انه بيدعك فى عينيه وايديه مش نضيفة
الحكاية مش شعره الجميل .. اللى متبهدل اخر بهدلة
ولا الحكاية فى هدومه .. الى باين عليها الضياع

الحكاية .. فى نظرة العتاب واللوم اللى فى عينيه اللى باصص بيها
نظرة بتسأل مليون سؤال وسؤال؟
وللأسف .. انا ماعنديش القدرة انى اجاوب على اى سؤال فيهم ..

الفكرة مش انك تساعد فقير .. ولا طفل يتيم
الفكرة انى بصيت على الطريقة اللى انا نفسى عايش بيها
عشان مايبقاش الكلام على حد ..
لقيت ان فيه حاجات كتير ممكن استغنى عنها .. لأنها فعلا مش مهمة ..
لكن ممكن تحسس غيرى انه لسة فيه أمل انه يعيش

كنت باسأل نفسى .. هو مش ربنا كان ممكن يخلق كل الناس فى طبقة واحدة
لكن بشوية تفكير .. لقيت انه ربنا بيخلينا نقابل فى حياتنا ناس هم فى الواقع امتحان
ياتنجح .. وتطلّع الإنسان اللى جواك .. وتفرّح ربنا بيك
يا تسقط .. وتموّت جواك احساسك بآدميتك .. وأكيد انت عارف ساعتها نظرة ربنا ليك

على فكرة الموضوع سهل ..
انا لما دققت فى ملامح الولد .. شوفت ملامح ابنى
عشان كدة قلبى اتوجع .. حتى من غير ماعرف سبب العياط
كان كل همّى ان دموعه اغلى من انها تنزل على اى حاجة
وانت كمان لو دققت .. يمكن تشوف ملامح ابنك ولا اخوك
مش هاقولك ساعتها تعمل ايه
انت اكيد عارف .. وافتكر الكلمة دى كويس

طلّع الإنسان اللى جواك