الفاتورة
صحيوا ماما وبابا الصبح بدرى علشان يروحوا شغلهم زى كل يوم وكان شادى نايم فى أوضته
بص ماما وبابا لقيوا ورقة على السفرة شادى سايبهلهم وكاتب فيها:
حساب امبارح:
10جنيه تمن انى وضبت أوضتى
10جنيه تمن انى نزلت جبت حاجات من السوبر ماركت
5جنيه تمن انى جبت كباية مية لماما
المجموع:25جنيه
بابا وماما مصدقوش الورقة اللى شادى سايبهلهم واتضايقوا جداااا وقرروا يكتبوله ورقة حساب هما كمان ويسيبوها لشادى.صحى شادى من النوم راح يبص على السفرة مستنى يلاقى الفلوس حساب امبارح لقى بابا وماما سايبنله ورقة بص عليها لقى مكتوب فيها:
حساب العشر سنين اللى فاتوا:
ولا حاجة تمن الأكل اللى ماما بتعملهولك كل يوم
ولا حاجة تمن ان بابا بيوصلك المدرسة كل يوم
ولا حاجة تمن كل لبس جديد جبنهولك
ولا حاجة تمن كل المرات اللى عييت فيها وسهرنا جنبك وادنالك الأدوية
ولا حاجة تمن كل مرة بابا بيكويلك لبس المدرسة
المجموع:ولا حاجة
اتضايق اوى شادى من نفسه وحس قد ايه بابا وماما بيتعبوا علشانه وعمرهم ما طلبوا مقابل لدا وهو بدل ما يقولهم شكراً بيطلب منهم حساب حاجات بسيطة جداااا عملها
احنا ساعات كتير بنبقى زى شادى وبننسى نقول لبابا وماما شكراً على كل حاجة بيعملوهلنا ولو طلبوا مننا حاجة بنحس اننا عملنا حاجة كبيرة قوى مع انها بتكون حاجة صغيرة جداً جنب كل اللى هما بيعملوه علشانا.
تعالوا نبدأ نتعامل مع بابا وماما بطريق مختلفة ودايماً نكون بنشكرهم على كل اللى بيعملوه علشانا ونطيعهم ونكرمهم زى ما الرب يسوع وصانا وقال"أكرم أباك وأمك" (خر12:20)