[walaa farouk]

انا اقولك الخلل فين يا سيدي

الخلل انك مش هاتلاقي العلاج ده في الصيدليات. مش عشان ازمة الدواء اللي في البلد هي السبب.ولا عشان سعر غالي ولا عشان مستورد.

مش هاتلاقيه لانه اصلا مش موجود.
لسه ماخترعوش النوع ده من العلاج. ولا هايخترعوه.

مافيش حبوب تاخدها وتنام تلاقي نفسك خسيت. او زدت 40 كيلو
ولا فيه حبوب تاخدها وتنام تلاقي نفسك بقيت متفوق. وذكي وبتحفظ
ولا فيه حبوب تاخدها وتنام تلاقي نفسك بقيت غني وصاحب شركة
ولا فيه حبوب تاخدها وتنام تلاقي مشاكلك الاجتماعيه اتحلت.

مافيش.وماتدورش. ولا تستني حل سحري ينزل لك من السماء. الحاجات دي بتحصل في الافلام بس. حاجه كده زي سوبر مان. خيال. لكن مش واقع.
انزل لي بقي هنا شوية على ارض الواقع كده الله يخليك.
عاوز تترقي في شغلك ومرتبك يزيد. اجتهد في شغلك.
عاوز تتعين معيد في الجامعه. يبقي تسهر الليالي عشان تذاكر.
عاوز جسمك يبقي رياضي ورشيق. لازم تطلع روحك في التمرين.
يا عزيزي. تعامل مع الحياة بمدأ
( كل حاجه بتيجي بالتدريج. بالراحه. بالصبر. بالهدوء. بالمثابرة بالإصرار)
احرق في اعصابك مهما تحرق - تيأس مهما تيأس - افقد الامل زي ماتحب. ابكي للصبح. دمر نفسيتك زي مانت عاوز ).
برده ربنا مش هايستجيب دعائك. عارف ليه؟
عشان ربنا ذاته هو اللي قال ( وقل اعملوا .... )
مافيش حاجه على كوكب الأرض بالساهل.
فانت لازم تاخد قرار حالا وقرار نهائي.
عاوز تخليك كده محلك سر مستني الدوا السحري اللي مش هايجي؟
ولا هاتفهم الحياة ماشيه ازاي. وتبدأ تتعامل مع الواقع بواقعية وارادة؟