[walaa farouk]

حصلي انهاردة موقف غريب ، ورغم انه احرجني الا اني كنت سعيد جدا بالنماذج الجميله اللي موجودة وسطينا دي
دخلت رسلان اللي في المنيب اجيب علبة كشري
طلبت علبة ودفعت فلوسها عند الكاشير اللي كان بره المحل
ودخلت جبت العلبة ، وانا خارج لقيت الشيخ جري ورايا عند العربية واتنين بيقولوه من المحل ، ايوه هو ده
قولتله فيه ايه !!
لقيتهم بيقولوا لواحد تاني رجع الكاميرا وهاته وهو داخل
بدأ يرجع الكاميرا ، وكل اللي في المحل سابوا الاكل وقعدوا يتفرجوا عليا في الشاشه وانا داخل وبدفع
وكل ده انا مش فاهم فيه ايه !!
قولتله ياشيخ فيه ايه فهمني !!
قالي لقينا عشرة جنيه مرمية تحت الكاشير ومش عارفين بتاعت مين ، والكاشير شاكك انها وقعت منك
قولتله ياسيدي الفاضل انا مستعجل جداً ، لو بتاعتي مسامح فيها ولو مش بتاعتي اديها معاك
قالي ابدا ، واصر وعاد الشريط ، وفعلا الكاميرا جابت الفلوس وهي بتقع من جيبي وانا بطلع تمن علبة الكشري
وراح ادهاني وقالي حلالك ،،
كان نفسي حد يصورنا واحنا كلنا بنتفرج على الشاشه كإن مصر بتلعب في كاس العالم
كنت محرج من دخلتي ووقفتي وقرعتي اللي كانت منورة امام الجميع

طب تخيلوا لو ربنا شغل قدام الكل شريط حياتنا لمدة يوم واحد بس على الملئ ، وحياتنا الفردية وافكارنا الداخليه بقت على مسمع الكل ، هيبقى شريط مشرف ولا هنتدارى !!

حدث_بالفعل