[walaa farouk]

بعد انتشار موقع صراحة.com فيه حاجات لازم تاخد بالك منها!











أحياناً كتير بنستغلّ مبدأ الصراحة في إننا نكون وقحين مع الناس، بحجة إن اللي قلبنا على لساننا! لكن الصدق اللي بيغيَّر فعلاً وبيفرق معاك ومع الناس اللي بتتعامل معاهم هو الصدق اللي دايماً معاه لطف ومراعاة لمشاعر الآخرين.

راجع نفسك ولو ده فعلاً اللي بتعمله فانت محتاج قبل ما تتكلِّم تحط نفسك مكان اللي بتكلِّمه، وتتفهَّم أفعاله وشخصيته ومشاعره.









أحياناً لما بندَّعي إننا مستعدين نسمع آراء الناس فينا وهنتقبل كل اللي بنسمعه مبتكونش دي الحقيقة. لكن بيبقى ورا ده كبرياء، تكبُّر بيخلينا عايزين نتمجِّد أكتر من الناس وبيخلينا نرفض أي انتقاد.

راجع نفسك كويس ولو انت واقع في ده فانت محتاج تشتغل على نفسك مع نفسك قبل ما تسمع آراء الناس.







أحياناً بردو لما بندَّعي إننا مستعدين نسمع آراء الناس فينا وهنتقبل كل اللي بنسمعه بتكون الحقيقة اللي ورا ده صغر نفس، بيخلينا جعانين جداً لأي مدح أو بيسيبنا مكسورين بعد أي نقد.

راجع نفسك ولو ده فعلاً اللي انت بتعدِّي فيه فإشباعك للنقص ده مش هييجي إلا من جواك، من إيمانك انت بنفسك.









أحياناً صراحتنا مبتكونش مجرد وقاحة مش واخدين بالنا منها، لكنها حقد قاصدينه وشايفينه كويس ناحية الشخص الآخر، يمكن لنقص جوانا أو لتكبُّر ناحيته.

راجع نفسك كويس جداً! الحقد ده مش بس بياكل الناس اللي حواليك، لكن كمان بياكلك انت من جواك!