[Rena Jesus]

لو كانت الدنيا مطعم و اللي احنا عاوزينه منها طلبات..
يبقى الزباين محتاجين يعرفوا ايه ؟
...



اهلاً بيك في "مطعم الدنيا"
Welcome to "Life Restaurant"

- كل وجبة هنا ليها فوايد غير الطعم و الاستمتاع ..
اعرف عايز ايه.. و اعرف عايزه ليه.

- المنيو عندنا فيه كل حاجة بس ماحدش بياخد كل حاجة..
اختار كويس و خلي طلباتك لايقة على بعض لتفادي مشاكل الهضم.

- اللي انت حتختاره موجود و مكتوب بإسمك..
فمتقلقش محدش حايخد أكلك و لا حتاخد اكل حد.

- مافيش حاجة هنا ببلاش ..
لو عايز حاجة ادفع تمنها و إنت راضي..
و الدفع قبل الاكل .. الشكوى من شروط الدفع مش حتعطل حد غيرك.

- التمن معروف و ثابت مافيش فِصال
بس مش لازم تدفعه فلوس ممكن تدفع مجهود او وقت او اي حاجة ليها قيمة.

- الوقت سنه كونية محدش يقدر يغيرها..
ف طلبك حياخد وقت عشان يجهز..
اتصالح مع الوقت ده و عيشه كأنك قاصد تستمتع بيه ..
و ما تستعجلش و ما تزنّش.

- انت قاعد على اساس ايه؟! المكان هنا self-service..
قوم حضر حاجتك و هاتها بنفسك!
الطلب مش حيجيلك لغاية عندك (مهما كنت تستاهل)..
آه كمان ساعد الزباين اللي حواليك يحضروا هما كمان .. اتحرك.

- احسن طعم حيوصلك عندنا بيحصل بالخبرة و التدريب مش مفاجأة ولا صدفة ..
جرب و درب نفسك على العادات و التشكيلات و الاضافات اللي بتوصلك للطعم اللي انت عايزه.

- استعمل كل طلباتك هنا.. مافيش Take Away ..
مافيش تيك أواي .. مافيش تيك أواي ... مافيش..

- توكل على الله و صلى كتير ..
ده مش مجرد واحد من الاوبشنز.،
ده قانون اساسي للشبع و الرضا

- الحلو هنا حاجات بسيطة (و بصراحة مش تخصصنا)..
بس لو عايز تحلّي بجد يبقى بره بعد ما تخرج من هنا ان شاء الله ..
افتكر تسيب مكان للحلو

بالهنا و الشفا Bonne Appetite
مطعم_الدنيا