انا كتيير قوي...
مش شخصيه واحده...
لو قابلتني او كلمتني فى وقت قبل ما انام بعد يوم مجهد وطويل او اول ما اصحي ...
هكون شخصيه لو حكمتي عليا وقتها وافتكرتي ان دي انا...
يبقي معرفتنيش
انا صبورة جدا...
وملياش خلق لاي حاجه
انا سعيده ومبهجه وكلي طاقه...
ومش قادره اتواصل مع حد ومجهده جدا
انا واثقه جدا فى اللي بعمله...
وبخاف جدا من اي خطوه جديده
انا اجتماعيه جدا وبحب الناس....
ومش طايقه اتعامل مع اى بشر
انا قويه جدا ومستقله واقدر اخد قرارتي لوحدي...
وفى منتهي الضعف ومحتاجه حد يطبطب عليا وياخدني فى حضنه ويقولى متقلقليش انا معاكي.
انا مش فارق معايا رأي الناس ولا يهمني حد...
وبفرح قوي لما يشجعوني وبضايق لما يقعدوا ينتقدوني.
انا عارفه كويس اعمل ايه أمتي وازاى....
وبهنج ومش عارفه اعمل ايه دلوقتى..
انا كل دول فى بعض...واكتر كمان..
بحاول افهم انا ليه بعمل كده...وليه مبعملش كده...
وسعات مبفهمش...فبحاول اتقبلني.
باستكشف ...واتقبل...وأحترم...كل اللي بيحصلي وبيحصل معايا
انا بني ادمه