التشجيع
يحيي لو استخدمتة بشكل مستمر مع كل اللي حواليك بدون تفرقة ( جنس & لون & دين & عمر & مناصب & تعليم )
و يميت .. لو بخلت تستخدمه مع حد
و تمسك في كلمة ( وانا مالي او تنتقد لحد ماتموت اللي قدامك )
التشجيع .. هو الوقود و المحرك الاول في كل مخلوق علي وجه الكره الارضيّة وعلي رأسهم الانسان طبعاً
بكلمات التشجيع اللي بتخرج منك ( اذا كانت فعلاً خارجة من قلبك مش مجرد شكل اجتماعي و تمثيل و إستهزاء ) لو خارجة فعلاً من قلب عمران بالخير
هاتدخل علي قلب اللي قدامك عدل و تأثر فيه بالإيجاب
و لو فض مجالس .. حتي لو بتقوله ( يا حبيبي )
هاتدخل علي قلبه و هايرفض يستقبلها منك لانه عارف نيتك
علشان كده مهم اوي
تصفي نيتك و تعمر قلبك بالخير والحب والسماح لكل البشر و شوف النتيجة
بكلمات التشجيع الصغيرة
- بتحول الخوف .. لانتصار
- بتدب النفس و الروح في قلب جثث لسه علي قيد الحياة
- بتحول العجز .. لارادة
- بتقول للإنسان .. انت مهم وليك كيان و دور و رسالة
- اه انت ترس جوة ماكنة كبيره اسمها الحياة .. بس لو الترس ده وقف جزء كبير في الماكنة مش هايشتغل
- بتاخد بأدين اخوك من الفشل .. للابداع والتميز
- بتنور الطريق للي قدامك و تقولة لسه في أمل في بكرة .. انت تقدر 💪
- بتدرب طفلك ازاي يخوض صعاب الحياة الكتيرة والصعبة دي و يكون شخص فعال و ناجح و منتج من و هو صغير
تلاقي
ناس بتشوف في كل وجع ومرار و مصيبة و مرض و فشل ( درس تستفاد منه و اصرار وتحدي اكتر لمواجهة الحياة )
و ناس .. في كل حاجة حلوة بتحصل ( تشوف صعاب و تطلع العيوب و تنتقد و تستخف و تهبط و تجيب لنفسها وللي حواليها اكتآب و تفضل طول عمرها محلك سر )
لو واحد بيعمل ٧ حاجات حلوة من العشرة
وانت بدل ماتشجعة تطالبة بال ٣ الناقصين
هايجي اليوم لا يعمل لا ال ٣ و لا ال ٧
علشان تكون شخص بتحفز و تشجع
لازم الاول تسمو بفكرك في الحياة بشكل اكبر و انقي من اي اختلاف بينك و بين اللي قدامك
يعني تبص علي الدنيا من فوق قوي
هاتلاقيها صغيرة و هاتخلص بسرعة
داخلتها فاضي و عريان .. و هاتسيبها برضة فاضي و عريان
و تفضل اعمالك و سيرتك اللي اثرت فيهم علي اللي حواليك ( سواء بالسلب و الجرم و الاساءة و الهدم .. او بالإيجاب و بالعطف و الخير و التشجيع للصغير و الكبير )
ربنا نفسه وصانا نشجع صغار النفوس
وأعظم ثواب ممكن تاخده
انك تسند الضعيف و الخايف
و تخلق منه إنسان شجاع و مبدع
يا سلام
مافيش اجمل من كده رسالة ممكن تقدمها للبشرية
فقط كٌنْ إنسان بيحركة دايماً الخير و التفاؤل و الصفاء
و لو شفت حد غلط و اخطأ
عاتب برفق و بحب .. هاتلاقيه يستجيب
لكن لو موته بكلامك و علقتلة المشانق .. هاتبقي بتخسره طول عمرك
الكلام السلبي أثرة علي النفس .. تمام زي القتل و الدبح
و الكلام الجميل البشوش المشجع اللي طالع بصدق فعلاً من قلبك .. بتبني جوه اللي قدامك الخير و السماح و البنيان ( بتساعد في بناء إنسان )
ربنا يدينا كلنا روح التشجيع الجميلة دي
و شوف حال اللي قدامك مهما طال الوقت هايتغير ازاي و تاخد دعاوي و بركة كبيرة قوي قوي قوي