أمبارح ولد في اوائل العشرينات رجله مكسوره أصحابه شايلينه سلالم كتير علشان يخرج معاهم و يروحوا سينما سوي...
الحقيقة أحنا كنا أجدع كتير و أحنا أصغر...
كنا بنحب بعض لأخر نفس و بنخاف علي بعض بجد...
كنا بنسأل و نهتم و يهمنا زعل بعض و مشاعر بعض...
كل لما بنكبر المسؤوليه و زحمه الدنيا و الحاجات اللي بنعرفها و بنفهمها و بنكتشفها مع حبة الصدمات اللي بتحصلنا بتخلينا نبعد عن أصحابنا شوية بشوية ...
بتخلينا وقت الجد نخاف نتعشم أوي او نستني ردود أفعال في الغالب مش بتحصل...
أنا فضلت سنين مراهنة نفسي أن مشاعري مش قابلة للتغير أتجاه أقرب الناس ليا...
و لما ده حصل أخدت وقت أكابر و مش عارفه أتقبل الواقع ده...
أخيرا تفهمت ان مش غلط أن مشاعرك تقل
و لا غلط انك متعرفش تبقي جدع لأخر نفس
و لا غلط ان طاقتك تقرب تخلص و توفرها لحد أولي اللي غالبا بيكونوا عيلتك
و لا غلط انك تنضج و ترتب أولوياتك صح
و لا غلط انك تدي كل حاجه حجمها الحقيقي من غير مبالغه..
مش لازم انك تتغير علشان زعلان او مستني أكتر او لأنك وحش او لأي سبب غير أنك فعلا بتكبر ...
بتكبر و بس