[walaa farouk]

العنوسة مش انك متتجوزيش راجل .. العنوسة انك مترتبطيش بنفسك .. العنوسة انك متحبهاش ومتحسيش بقيمتها ..

عارفة اية هى العنوسة الحقيقية ؟!

العنوسة الحقيقية انك تفضلى طول حياتك فى دور مكنش المفروض يكون دورك وبتلبسى رداء شخصية اقل بكتير من قيمتك وتفضلى طول حياتك ندمانة على الدور دة ...

العنوسة الحقيقية انك تفضلى عايشة بدون ما تبقى الشخص اللى انتى نفسك تكونيه وانك تحققى ذاتك وكيانك وانك تخلى احلامك حقيقة ملموسة وانك تعافرى عشان توصلى ...

العنوسة الحقيقية انك تكونى " عبدة " لافكار تراثية وتقاليد ماسخة هدفها تقليلك وتحطيمك ... متستسلميش لافكارهم ... متستسلميش لرغباتهم ... الله لا ينقصه ابداع عشان يخليكى مجرد نسخة من اللى قبلك ... ولا خلقك لمجرد تكونى اداة هدفها الوجودى وسيلة للانجاب وللحفاظ على النفس البشرية من الانقراض ...

العنوسة الحقيقية انك تقفى قدام المرايا فى يوم من الايام حتى وانتى متجوزة وتشوفى حد تانى غير اللى انتى كان نفسك تفخري بيها وغير اللى كان نفسك تشوفيها ...

العنوسة الحقيقية انك متبقيش حاسة بذاتك وقيمتك وقوتك وقدرتك " لوحدك " ...

الحب اللى بيدخل حياتك بهجة وحلم لكن مينفعش يبقى كل حياتك واقفة على " الفستان الابيض " .. انتى قيمتك اكبر من الفستان .. انتى قيمتك فيكى وفى قلبك وفى عقلك ...
انتى مش محتاجة لراجل عشان تكونى ... انتى اصلا " كيان " متميز و رائع ومهم وكفاية انه يتنفس حياة حقيقية فيها اهداف واحلام ...

حتي في وقت الارتباط فالراجل الحقيقي لما يفكر يرتبط هيرتبط بالبنت اللي عقلها ناضج وبتفكر وبتحلم وقلبها قوي وقادر كفاية انه يسند وصاحبة الشخصية اللي تقدر تربي ولاده علي انهم ازاي يواجهوا الحياة :-))