[Rena Jesus]

ملحوظة قبل ما نبدأ:
الموضوع ده ممنوع لضحايا الافكار الانهزامية ومرضى "اهي عيشه و السلام"

إوعى تقع في فخ الإنتقام من الدنيا

في بعض الناس بيشكلوا جوه دماغهم فِرَق دفاع داخليه من الغل و الغضب، أو العنف و جلد النفس، أو الشكوى و لوم الآخرين، أو الحزن و التألم و الإنحسار، أو كله على بعضة.. الناس دول بيبقوا متصورين إن ده رد فعل طبيعي و حق مشروع بسبب اللي بيحصلهم في حياتهم..

عارف الناس دول؟ أما تشوفهم خد ديلك في سنانك و طير

في نفس الوقت، و على صعيد آخر، في علم و منطق و قوانين و تجارب بتأكد ان الحالة الذهنية الدفاعية دي مش بتسمح في العادة بالتحرك السليم ولا القرار الحكيم
(كمثال: بتقلل قدرات الدماغ في المتوسط باكتر من ٣٠٪) ..
يعني من الآخر لا هي بتخرجهم من اللي هما عايشين فيه و لا حتى بتريحهم و هم جواه!...
و أهي عيشة و السلام ...

الحياة الحقيقية بقى بتبدأ من تحمل مسئولية حياتي الشخصية ((لوحدي)) و شغلي عليها.
تعالى نقول ان الحالة الذهنية المطلوبة للحياة دي بتتكون من ١٠ حاجات؛
الحرية
و التسامح
و الهدوء
و البساطة
و القوة
و العزم
و المرونة
و التفاؤل
و الرضا
و الإيمان..
بسيطة؟

الحاله دي بقى في مجموعها عبارة عن إختيار و قرار شخصي جداً مالوش علاقة بالظروف ولا الأحداث ولا الناس!

طب بفرض اني اقتنعت و عاوز أبدأ أجرَّب دلوقتي ..أبدأ منين؟

١- اكتب انت عايز توصل لإيه و إمتى
٢- قيس حالتك العامة و حللها و اعرف هي مكونة من ايه
(يعني اكتب الحاجات اللي انت حاسس بيها و بتفكر فيها)
٣- اكتب مكونات الحالة المظبوطة في لستة
(قصدي ال١٠ مكونات اللي قولناهم فوق)
٤- إدي نفسك سكور على كل واحدة من ال١٠
٥- اسأل نفسك إيه الحاجة اللي أقدر أعملها الشهر ده عشان أرفع السكور ده درجة واحدة لكل واحدة فيهم
٦- آخر كل يوم ماتنساش تكتب ٣ انتصارات صغيرة قدرت تحققهم في يومك

بس كده.. نهارك زي ما انت عاوز تشوفه


اتحمل_مسئولية_حياتك
الحياة_هي_اللي_جاي
عيش_حر