[Rena Jesus]

المنظر من قريب قوي عمره ما بيتشاف صح ولا بيدي معنى كامل ..
عشان كده ساعات و احنا غرقانين في وسط أحداث اليوم بنتوه و التفاصيل بتكبر و تتحول لأشكال مرعبة مش مفهومة و مش حقيقية ..
بتبدأ دماغنا تتعامل مع التفاصيل و الأحداث دي باساليب دفاعية زي الإسقاط و التسويف و الأعذار والغضب و الشكوى و اللوم و الاتهام .. الخ ..
الأساليب الدفاعية دي بتريح في الاول بس لما بتكبر و تزيد بتكسر شخصياتنا حتة حتة و بتحطنا تحت ضغط مستمر و ممكن تخلي حياتنا كلها تاخد شكل احنا مش عايزينه!

الحل اننا ناخد وقت مستقطع و نبعد شوية عن التفاصيل
حنلاقي التفاصيل بتصغر و الصورة الكبيرة اوضح و اسهل في الفهم و التعامل
و الأهم اننا مع تكرار التدريب ده حنبدأ نلاقي بوصلة و اتجاه للحياة و حرية اكتر اننا نتحرك و نغلط و نتعلم و نقلع الاقنعة اللي لازقة على وشوشنا ...

طب اعمل ايه يعني؟!

اعمل ١٠ دقايق في اليوم (حاول كل يوم)
اقعد لوحدك و اسأل نفسك الاسئلة دي و جاوب بورقة و قلم:

- انا حاسس بإيه النهاردة ؟ ايه اللي خايف منه و ايه اللي بتمناه؟
- انا بأعمل اللي انا باعمله االنهاردة عشان عايز اوصل لإيه؟
- لما اوصل للي انا عايزه ده، حيضيف لحياتي؟ إيه و حاعمل ايه بعد كده ؟


الحياة_اللحظة_دي
الاتجاه_أهم_من_السرعة