[Rena Jesus]

افكار في التربية بطريقة عملية:

حضرت بالصدفة حديث لمدة ثواني بين ابن (عمره حوالي ٧ سنين) و ابوه..
الأب كان بيرد على ابنه بطريقة كأنه منافس ليه في السوق أو محتل بلده او شنكله قبل كده و هو بيجري عالاسفلت!
نظرات سريعة غير مهتمه مع كلضمه كأنه قرفان يبص ناحية الولد..
طبعاً زعلي و حكمي الشخصي على الموقف غير عادل لأني ماعرفش ظروف الأب في اليوم ده ايه و كده ..

السبب في تعليقي اني حتى لو مش عارف ظروف الأب فكلنا عارفين كويس الأثر اللي بيسيبه نوع التعامل ده على الابن!
انا أب و بقع ساعات في كل انواع الاخطاء!
بس بحاول اصلح و باعترف اني عندي اختيار ابقى احسن

كلنا بنبني مستقبلنا و مستقبل الكون في تربية العيال دي و كلنا عاوزينلهم مستقبل احسن و healthy اكتر!! .. صح؟ طب نعمل ايه؟ ..

محتاجين نربي اولادنا على حاجات اهم لحياتهم بكتير من اللي بيتعلموه في المدارس و محتاجين نعمل ده بطريقة عملية عشان التنظير و النصح من غير تطبيق اثبت فشله من زمان ..
ادي بعض الافكار:

١- علمهم الاحترام:
أما حد من اولادك يكلمك بص له و ركز معاه و اسمعه من غير مقاطعة و بعدين رد عليه بتفهم! عشان يتعلم الاحترام في الحديث و يعرف من جواه انه كائن محترم فيتعامل على الاساس ده.. على فكرة مهما كان كلامه مش مهم اوي بالنسبالك اعرف انه مهم اوي بالنسباله

٢- علمهم الحب:
جرب لما حد من اولادك يقولك تعالى نلعب ترمي اي حاجة في ايدك و تقوله ياللا نلعب و تقوم معاه ... جرب كمان تقوله انك بتحبه من غير سبب.. مافيش حاجة تستاهل الصيانة و الاهتمام قد قوة علاقتك باولادك! في يوم من الايام اللي حينفعك و ينفعهم هي العلاقة دي

٣- علمهم الثقة و اتخاذ القرار:
خليهم يختاروا و ياخدوا قرارات في حياتهم اليومية، يتحكموا في مصروفهم و لبسهم و وقتهم و مذاكرتهم .. اما تعوزهم يعملوا حاجة اديهم اختيارات و خلي التقييم على النتايج و اديهم حرية على قد ما تقدر في الطريقة اللي بيوصلوا بيها للنتايج..

٤- علمهم البساطة و التواضع و الكرم:
اشركهم معاك في التطوع و التبرع و مساعدة الناس و اعمال الخير و علمهم يعملوا ده بتواضع خليهم يروحوا للناس و يتكلموا معاهم .. لما تكون حتدي حد حاجة ما تندهوش، نزل ابنك او بنتك يديها بإيده و علمه ينزل لمستواه ما يديهاش من فوق!

٥- علمهم الصبر و الايجابية و سعة الحيلة:
لما يكون في عندهم مشكلة خليهم هم يحاولوا يحلوها بس حسسهم انك معاهم و فاهم احساسهم .. وفرلهم مساحة آمنه و حنينة عشان يحسوا و يحبطوا و يعيطوا و يتعلموا.. اسألهم ساعتها عن احلامهم و اهدافهم و نفسهم في ايه و ايه نقط القوة اللي في حياتهم اللي ممكن يستعملوها..

٦- علمهم انهم مسئولين عن حياتهم و تجربتهم:
لما ينجحوا في حاجة او يوصلوا لحاجة امدح مجهودهم و اصرارهم و تخطيطهم و طريقتهم في ادارة الامور اكتر ما بتمدح ذكائهم و جمالهم و طعامتهم عشان يعرفوا قيمة بذل الجهد بدل ما يعتمدوا على اللي لقوه عندهم من غير مجهود

٧- علمهم ياخدو الامور ببساطة:
اعمل جرعة يومية من التهريج و الضحك مهما كانت الظروف و لما حد من ولادك يقع خليه يقوم يقف بعد الوقعه لوحدهم ما تقومش تشيله