تيجى ننسى اللى فات
ونبدأ تانى من جديد
ننسى الالم والوجع
والمشاكل اللى خلتك عنى بعيد
صدقنى طلباتى مش كتير
ده كل هدفى انك تعيش سعيد
جرب تدينى قلبك
وعينيك بس تكون عليا
صدقنى اكيد هتستريح
بدل من عيشه الذل ديا
تعالى نبدأ صفحه جديده من السنه دى
وهانسى كل الصفحات اللى بارادتك بقت مطويه
كنت مجهز لك بركات كتير
لكن ياخسارة انت كنت مشغول
بس متخافش انا هعوضك
اصل مراحمى لاتزول
عاوز اشوفك زى ماكنت بتمنى
انسان حر وفرحان
عاوزك دايما ثابت فيا
مش اى ريح تيجى تخبط فيك شويه
مستنيك تكلمنى
وتقرا كلماتى المنسيه
وعمرى ماهقولك انا مشغول
او حتى اقولك استنى شويه
جرب انت بس وشوف
متخافش مش هتتعب عشان تلاقينى
اصل انا مكانى معروف
بس انت بص جواك
هتلاقينى هناك على واحد من الرفوف
مستنى ارجع مكانى الاصلى
مستنى اعيش جواك يبنى
مستنيك تضحك من تانى
ويختفى انسانك اللى بيعانى
مستنيك متأخرش عليا
عاوز افك كل السلاسل اللى ف ايديك ديا
عاوز اشوفك غصن ثابت فيا
شكله اخضر وجميل
وثمرة بيطلع ف المعاد
عاوز اشوفك انسان قوى
مش بيحركك عدوك وكأنك جماد
مستنيك
امضاء
يسوع