[Rena Jesus]

_ فايز كنت محتاجه اتكلم معاك شوية.......
ممكن؟


_ اه يا حبيبتي اتفضلي ..


_ امبارح وانا في ال ...
فايز .... ينفع معلش تركز معايا؟


_ اه اه مركز اهو كملي..


_ امبارح نزلت العربية لقيت...
يا فايز لو سمحت!


_ في إيه يا ستي سامعك!

_ سامعني إيه بس ..........
وانت باصص في الموبايل وعمال تضحك!!


_ وماله يعنى أما أبص في الموبايل!
انا سامعك! تحبي أقولك قلتي إيه كمان؟!


_ ماهو القصة مش إنك سامعني وخلاص!
أنا إستأذنتك إني محتاجه أتكلم معاك في موضوع مهم بالنسبالى وانت قلت اتفضلي..
يبقى على الأقل سيب الموبايل وبصلي وانا بأتكلم!
حسسني بالإهتمام يا أخى شويه!
مش انا بحكي حاجة مهمة وانت بتضحك على بوست صاحبك وتقولي سامعك!


_ إنتي مالك مأفورة كده!
ما امسك الموبايل ولا ما أمسكوش أنا حر!
فى ايييييييه
هو أنا لازم اسيب اللي فى إيدي يعنى وأبصلك وانتي بتتكلمي عشان ابقى مهتم؟!
إنجزي وقولي كنتي عايزه إيه!


_ خلاص يافايز مش عايزه حاجه ............