[Rena Jesus]

"إن جه بيتك جاب الحق عليك"

المعنى اللي في المثل ده جميل جدا!
أما اتنين بيزعلوا من بعض عادة - لو هما ناس طيبة - واحد منهم على الأقل بيدخل في صراع نفسي رهييييب بين إني متضايق جدا من فلان بس في نفس الوقت مش عايز يفضل بينا زعل حتى لو مش هنشوف بعض تاني ..
طب أعمل إيه؟!
ما أنا خايف أكلمه يصدني...
خايف أبعت له يشوف المسدج ومايردش أو يرد رد بايخ يزعلني أكتر..
خايف مايكونش هو فارق معاه أساسا ولا عنده أي مشكلة إننا نفضل زعلانين!
خايف يفتكر إني مدلوق بقى ولا أي بتاع! خايف أخد خطوة لا الموضوع يتعقد أكتر!

صراع فعلا رهيب كل يوم مع نفسه ومع شيطانه!
مش لأنه الأضعف ولا الغلطان أكتر ولا اللي محتاج التاني أكتر.. بالعكس!
ده لأنه الأطيب عشان كده مش عايز يفضل فيه زعل بينه وبين حد..
ولأنه الأقوى عشان قدر يتغلب على الصراع ده ويبادر هو ويكلمك!
هو كده فعلا جاب الحق عليك

وعشان كده لو بعد كل ده إنت صديته يبقى حاجة من إتنين:
يا إنت إنسان شرير وغشيم وعايز تضرب بالجزمة 😄
يا إنت جواك وجع رهيب منه أكبر حتى من اللي هو متخيله وفي الحالة دي الحل فعلا إنك بعد ما تقدّر جدا إنه كلمك..
إنك تجيبوا كده وتطلع معاه كل اللي جواك عشان تهدى وبعدين تتصالحوا..
وحتى لو قررت بعدها إنك تبعد عنه لأي سبب...
قدّر وإتصالح وإبدأ على نضيف !