[Rena Jesus]

كنت بتتمنى حاجات بشدة .. فكرت فيها كتير .. وحاولت فيها اكتر
بس مفيش اي تغيير ولا حاجة منهم بتحصل
حسيت باحباط .. يأست .. استسلمت
وفي وقت انت متتوقعهوش حصلت الحاجة دى ..
بس انا دلوقتى معنديش نفس الشغف .. انا مش عاوزها .. مانا حاولت كتير ..

لا ثوانى كده .. ياسلام ... دى طلعت اجمل من اللى انا خططت ليه ..
دى حقيقي مناسبة كأنها متفصلة بالميللي علشانى ..
انا ربنا مسابنيش ..كان مستنى يفرحنى في الوقت اللى هو شايفه صالح

*اوقات كتير الواحد يفضل سنين نفسه في حاجة معينة .. عطية .. او وظيفه .. او ارتباط
ويفضل يحاول فيها لحد مايتعب من الاحساس بالفشل ويفتكر انه متروك من ربنا ..

النظام بتاع ربنا مختلف تماما




في وقت اشباع الجموع .. كان ممكن في لحظة يخلق وليمه لكل الناس ..
لكن استنى لحد لما قالولوه معندناش غير خمس خبزات وسمكتين
تفكر بعقلهم .. قلق .. ارتباك ..احنا الاف ..
حاولنا كتير ندور على اكل ملقناش .. خلصت ..مفيش اكل هيكفي

لا ده يسوع طالب القليل اللى معانا ..
هو طالب يبارك في الحاجة اللى تعبنا فيها .. احنا مش منسيين

وفي وقت موسي النبي وشعب اليهود كان ممكن في لحظة يطلعهم من ارض مصر
لكن قسي قلب فرعون وحصلت العشر ضربات واستنى لحد لما شعب اليهود كان في وضع صعب المصريين وراهم والبحر قدامهم وفجأة انشق البحر وعدوا

طاب نفكر مكان اليهود .. احنا عملنا كل حاجة .. تعبنا .. يأسنا .. اكيد هنموت ..
لا لا استنوا كده ده البحر بينشق اهو .. ده حقيقي .. ربنا مسابناش ..
احنا مش متروكين

ربنا عمره ماتركك لحظة وحده .. كان شايفك وانت بتتعب وبتعافر ..
وانت بتقع وبتصلي وبتكمل من تانى ..
كان حابب يشوف اد ايه هتطلبه .. هتناجيه ..هتصرخ

كان فرحان وانت مدخله في تفاصيل تعبك
بس عمره مانسيك .. في الوقت المناسب استجاب ..
ولسه هيستجيب وهيغرق حياتك عطايا

عطاياك لا متناهية ويداى صغيرتان