نكته بايخه
واحد بلديتنا اتضرب سبعين قفا علي سهوه ...
ههههه.... بايخااااا اوي وقديمه .جدا !
طب ما أنا عارف انها بايخه وقديمه !
بس السؤال ، كام بنت عايشه النكته دي ؟
كام بنت بيتقال لها باحبك وبعد كده يختفي ويرجع بمبررات ويختفي ويرجع بندم ويختفي يرجع بعياط ويختفي ويرجع بعيل ،
وهي زي الهبله تصدق وتسامح ؟!
كام بنت بيتقال لها بأحبك وانتي تعتبري مراتي قدام ربنا
وبموجب كده بيستدرجها لأي تجاوز يخالف تربيتها ودينها؟
كام بنت بيتسرق عمرها وشبابها تحت مبرر لسه عندي دراسه وجيش وامي مش موافقه وابويا ف المستشفي وخالتي بتولد وعمتي هاتبعتلي عقد عمل في الخليج ،
وبالتالي مش هاينفع اقابل اهلك وخلينا علاقه ف السر لحد ماربنا يفرجها!
لو حضرتك عايشه النكته دي يبقي صارحي نفسك انك بتخدي كل يوم سبعين قفا ،
مين شطوره في بناتي الحلويين وهاتقول اناااااا ،
وتقرر دلوقتي انها هاتبطل تتضرب علي قفاها ؟