[walaa farouk]

اتأمل فى قايين وهابيل براحتك..وخلص تأملك وادبح اخوك بكلامك من ورا ضهره .. واقتله فى مشاعره ... وماترحموش بقسوتك!!
اتأمل في قصة ابراهيم و لوط براحتك .. و خلص اعجاب بقصتهم و روح نقي لنفسك احلي حاجة .. خليك اناني دايما وهمك مصلحتك وبس .. اخسر قرايبك وحبايبك عشان مصلحتك ... و دوس ع المحبة و ارميها ف الزبالة عشان خاطر مركز او فلوس او راحة شخصية !!

اقرا قصة يعقوب و راحيل و اضرب بيها المثل و اوعظ عنها و عن كمية الحب دي .... و سيب خطيبتك ف اول مشكلة تقابلكم .. و انتي ماتصبريش علي خطيبك ولا تستحملي ... اجري اتجوزي اللي جاهز أحسن !!

اسمعوا مثل السامري الصالح و اتعجبوا من صلاح الراجل دا حتي للغريب و لوموا الكاهن اللي عدي و ماساعدوش مع انه قريبه ... و لما تخلصوا اشتموا اللي مختلف معاكم و اكرهوا اللي غريب عنكم و ماتساعدوش اللي بيطلب منكم مساعدة حتي لو من قرايبك بس مقرف وغلبان ياعيني !!

اقروا قصة السامرية و حضروها و احفظوها و احكوها ف مدارس الاحد لاولادكم ... و قولوا لهم أد ايه ربنا حنين و مكسفش واحدة خاطية زي دي و سافر لها بلاد عشان يقابلها ... و لما تخلصوا دوسوا ع الخطاة و التعبانين و ذلوهم وأنبوا ضميرهم و امشوا شهروا بيهم وأد ايه هما وحشين و ابعدوا الناس عنهم
و اهملوا ف الافتقاد وماتهتموش غير بالحلوين بس !!
اقروا قصص الكتاب المقدس و اتأملوا فيها و اكتبوا كل يوم بوستات منها .. علموها لاولادكم ف مدارس الاحد و اقفوا اوعظوا بيها ع المنابر ... اتبسطوا بيها اوووي واضربوا بيها المثل !!!
بس ف حياتكم اوعوا تطبقوها ... اوعوا تبقوا شبه ابراهيم و يعقوب و يوسف و دانيال و المسيح
خليكم شبه قايين و الفريسي و الكتبة و انتوا مش دريانين
احفظوا الانجيل و اقروه كل يوم بس انسوا انكم تتعاملوا بيه ف حياتكم .. انسوا انكم ترحموا بعض و تحبوا بعض بجد ..انسوا انكم تعيشوا بيه مش بس تقروه

و اخر اليوم ناموا مبسوطين بنفسكم انكم خدام و ووعاظ وحافظين الانجيل طمنوا ضمايركم انكم زي الفل !!

الانجيل اكبر من كتاب قصص قاعدين بنحكيه لبعض ... لو ماعشتوش تبقي لسه مافتحتوش