[Rena Jesus]

موسم الجفاف

الولد الدنجوان - مدمن العلاقات-
بيحصل عنده ظاهره غريبه اسمها موسم الجفاف !

الدنيا تبقي فل والحياه كلها بنات وفجأه وبدون مبررات يختفوا كلهم ،
وطبعا هو مدمن بنات زي ماقولنا ، فيبتدي يدور في دفاتره القديمه ، لو كان تنك اوي هايبعت رساله لكل البنات اللي سابهم ،
وحشتيني- انتي فين - طب اسألي - او يبعت قلب مثلا .
ولو مش تنك هايتصل بواحده واحده ويشوف مين هاترد ،



البنت اللي وصلتلها الرساله او المكالمه لو لسه بتحبه هاتنهار فورا وترد زي العبيطه لانها فاكره انه لسه بيحبها او افتكر ذكرياتها الجميله ،
وحشتني ياندل - ياخاين - لسه فاكرني ،




وارد يكون مش فاكرها اصلا بس هايبتدي يبرر هو ليه انسحب من حياتها ، وغالبا بتكون مبرراته غريبه .
اصل انا كنت راكب مدكوك فضائي ونازل من كوكب زحل فخطفتني كائنات خرافيه وطلبوا ديه من ابويا ولسه دافعها ،

البنت لانها بتحبه بتقرر تصدق وتقوله فورا
ارجوك ياحبيبي بلاش تروح زحل تاني ،
بيحلف الولد انه مش هايبعد تاني والعبيطه بتصدق وطبعا بتملي فراغ حياته لحد ما موسم الجفاف يخلص بظهور اي صيد جديد ،
ويختفي الولد فجأه وتحاول البنت تسأل عليه في زحل في عطارد او الزقازيق وماتلاقيهوش ،

يمكن بعد كام شهر او كام سنه يتكرر الموسم وتتكرر المكالمه ،
بس النتيجه واحده ، انتي مجرد مسكن مؤقت لإدمانه المرضي ، واي صيد سهل بيتساب سهل ،وعلي راي احمد عدويه ايزي كوم ايزي جو.




ارجوكي .... ارجوكى
لما يتصل قوليله معلش ياضنايا لف لفه وتعالي علشان بأغسل المواعين وايديا فيها صابونه .
هايفهم علطول .

cpd