[walaa farouk]

دي مركب قديمة و بايظة كانت على الشاطئ .. و شكلها مرمية هنا من فترة كبيرة .. واستغربت ايه اللي حصل للمركب دي ووصلها للبهدلة اللي فيها ! خصوصا أن شكلها كان كبيير ..

يمكن اللي كان متحكم فيها مكنش فاهم فيها .. يمكن عدم صيانة مستمرة .. يمكن محدش اهتم بيها .. أو يمكن حد اشتراها لمصلحة معينة و بعدين رماها .. المهم أن المركب دي وصل بيها الحال إنها مرمية ومتكسرة و متبهدلة .. واللي أنا واثقة منه أن اللي صنعها أكيد مكنش هدفه أن المركب يكون ده حالها أو يكون ده دورها في النهاية !! المركب ليها دور مهم في الصيد و النقل.

مهمتها كبيرة يعني مش سهلة .. تفتكروا لو المركب دي فضلت مع الراجل اللي صنعها وكان هو اللي بيهتم .. ده كان هيبقى منظرها؟!

و ده أوقات كتير اللي بيحصل معانا احنا .. الله لما خلق كل واحد فينا، خلقه ليه هدف كبير ودور مهم .. بس ساب لينا حرية الاختيار .. يا نفضل معاه ونعمل دورنا المهم وننزل البحر .. يا نسيبه و نروح لحد كل هدفه أنه يدمرنا أو يستغلنا وبعديها يرمينا على الشاطئ .. وفي الآخر هيكون ده حالنا مرميين ومتكسرين ..

بس عارفين .. الفرق بيننا و بين المركب دي ايه ؟! ..

اننا لو اتكسرنا وحالنا بقى اوحش من المركب دي .. لسة عندنا فرصة اننا نتصلح لو اخترنا نرجع تاني للي عملنا .. بلاش تضيع سنين حياتك وأنت مرمي على الشاطئ و شايف البحر و مش قادر تنزل .. أنت مهم و ليك خطة وهدف ..