[Rena Jesus]

- مفيش اقوى من ( البنت ) "المرتاحه" ومقصدش هنا البنت القويه .
لا اقصد البنت المرتاحه فى كل حاجه فى حياتها .
المرتاحه فى لبسها .
المرتاحه فى شكلها ،
المرتاحه فى طبيعه جسمها ، ومتقبلاه كما هو ومش شايفه فيه اى عيب .
مرتاحه فى علاقتها بالناس الى حواليها.
مرتاحه فى انها بتقدر تقول للناس 'ﻷ' بكل صدق وقوه .
مرتاحه فى تطلعاتها للاحسن وانها شايفه انها متستحقش الا ( الأفضل) ليها ،

و (الراحه) هى اقصى درجات تقبل الذات وحب الذات ، بدل جلد الذات وكره الذات .
المرتاحه ، بتكون دايما بسيطه
مش بتتكلف فى كلام ، او لبس ، او حتى ميك اب .
كل حاجه فى حياتها بسيطه وبتكره التعقيد والافوره حتى فى توضيح مشاعرها بسيطه
بتستخدم ابسط الكلمات علشان توصل اقوى المعانى وادقها .

المرتاحه ، مريحه فى تعاملاتها مع الاخرين .
بتفرح جدا لابسط الاهتمام ، وكمان معندهاش مشكله تهتم للابد لو حست ان الى قدامها محتاج الاهتمام دا .
المرتاحه ممكن تاكل فى اى مكان ميهمهاش مطعم غالى او رخيص .
ميهمهاش نوع معين من المزيكا ، لو عجبتها اى اغنيه لاى عازف او معنى او اى نوع برضو هتسمعها .
مش بتحكم ابدا على الاخرين طبقا لشكلهم او مادياتهم او حالتهم الاجتماعيه .
دايما بتحكم بالى بتشوفه جواهم وفى قلبهم .

الناس اللى زيى دى "نادره" وبقت عمله صعبه دلوقتى وسط مجتمع بيصرخ
(بالتعقيد والافوره فى كل حاجه فى حياته)
الناس دى بحسها عامله زى 'ملايكه' بتمشى على الارض علشان بدول بنحس انه فعلا للحياه 'طعم' ...