خليك_في_حالك
نفسي اسأل سؤال ..لنفسي قبل حد تاني ...
هو احنا ليه بندي للناس اكبر من حجمهم ف حياتنا ؟؟؟
الإنسان بطبعه فضولي .. متسلط ...
يحب إصدار الإحكام على خلق الله .. يحب يستقوى و يعيش دور
و ما بيصدق يلاقي اي حد ضعيف او مستكين كدة علشان يمارس عليه هوايته السلطوية ...
و يبتدي يسأل و يستفسر و يتدخل و مرة واحدة بدل ما كان واقف ع الباب
.. تلاقيه لابس بيجامتك و نايم ف اوضتك ...
دي فطرة انسانية طبيعية موجودة مانقدرش ننكرها ..
احنا بقى ليه نديله الفرصة دي ؟؟؟!!!!
المفروض نحط القواعد لزائري حياتنا بدون اي خجل
ماننتظرش فكرة (اللي ما يشوفش من الغربال ...الى آخره ) ..
و انه هيفهم لوحده .. لإن ببساطة ... كلهم بقوا عمي ..او يتصنعوا العمى ...
احنا اللي المفروض نوقف كل واحد ف مكانه ...
و غير مسموح لأي كائن ان كان التدخل في حياتنا الا بالمدى والكيفية والنوعية اللي احنا بنحددها
بدون اي مبررات او شعور بالذنب .. .مش لازم اشرح ... مش لازم اختلق اعذار ..
مش لازم ابرر كل تصرف ... و مش لازم برضه توصلني اني اقولك (انت مالك !!؟؟؟ )
...مع انه فعلا ...انت مالك
...انا ادرى بظروفي ..انا ادرى بحالي ..
ادرى بقدراتي و اولوياتي و تنظيم حياتي ....
و دة مبرركاااافي و مرضي جدا ...لنفسي قبل اي حد تاني..!!
ببساطة ...ما ينفعش افتح الباب و ارجع استغرب من الناس اللي دخلت ...
ما ينفعش اديهم حق التدخل ف حياتي و ارجع استغرب انهم بيستخدموه ..
ماينفعش افضل عاملة حساب و شايلة هم كل واحد هيقول ايه و لا رد فعله ايه
و ارجع اشتكي ان اعصابي مضغوطة .
حط حدود .. اقفل ابواب .. قول القدر اللي عايز تصرح بيه ..
اظهر الحاجة اللي عايز تظهرها بدون اي شعور بالمسؤلية انك لازم تبقى كتاب مفتوح ..
و لا احساس بالذنب انك مداري حاجة ..
و لا الشعور بالغضب انهم قروه كله .
حط حدودك
كفاية تدخل