[walaa farouk]

ازاى بتمسكى اعصابك لما الطفل يعمل مصيبة ؟؟

اليكم بعض النقاط الهامة :

1- لأن لو فكرنا فعلا فى أصل المصيبة هنلاقى اننا سببها 100% مش الطفل !

- طفلك بوظ موبايلك او لاب توبك ؟ انتى سيبتيه فى متناول ايده !
- طفلك قطع أوراقك المهمة ؟؟ ... انتى ما حفظتيش الاوراق فى مكان أمين !

الطفل اللى يادوب بيعرف يتكلم ، أكيد مش هايفهم ان اللاب توب ده غالى ولا ان الورق ده مهم ، كل حاجة فى البيت حواليه عبارة عن كنز قابل للإستكشاف و اللعب .

" مش عايزة مصايب ... يبقى شيلى مصادر المصايب من قدام الطفل "

2- لأن لو فكرنا شوية فى المصيبة الى حصلت ، ممكن نكتشف ان الطفل مش قاصد انه يعمل كده !

- الطفل كان بيحاول يشيل كوباية المية يشرب منها زى الكبار ، غصب عنه وقعت اتكسرت .
- الطفل كان بيحاول ياكل لوحده زى الكبار ، غصب عنه بهدل الدنيا .

" فى الحالة دى ، مفروض نشجعه و نعلمه و نديله الفرصة انه يكرر الفعل ده عشان يتقنه ، مش نزعق له و نتوعد و نهدد عشان يخاف يجرب حاجة تانى فى حياته "

3- لأن زى ما الطفل ممكن يؤذى بيئة الكبار بتاعتنا ، فالبيئة بتاعتنا دى هى كمان بتؤذيه !

- الطفل مش قادر يتحكم فى حركاته لأن كل حاجة حواليه أكبر من حجمه أضعاف ! تخيل نفسك بتشرب شوربة بمغرفة الطعام الكبيرة ... هاتقدر تتحكم فيها بسهولة ؟!

- الطفل مش قادر يتمتع بالحرية اللى مفروض يمتلكها فى استكشاف العالم الجديد اللى لقى نفسه فيه ! كل حاجة ممنوع اللمس و الاقتراب ، كائنات ضعف حجمه بتيجى تصرخ فى وشه و احيانا تؤذيه و تؤلمه بدنيا و نفسيا ... ايه الحياة البائسة دى ؟!!

" وفرى لطفلك بيئة و أنشطة ملائمة لتطوره العقلى و الجسدى ، عشان يقدر يطور تحكمه الحركى و بالتالى يقدر يتمتع بالحرية اللى عايزها و يكون طفل سعيد "

أخيرا ...

لازم تفهموا ان مفيش طفل شرير و لا طفل مستفز و لا طفل رخم و لا الكلام ده خالص ...
أى صفة بتظهر فى شخصية الطفل فهى بسببكم انتم فى المرتبة الأولى ...
انتو بتزرعوا فى الطفل و بتحصدوا ثمرة تعبكم
اللى هايجتهد و يراعى نبتته كويس ، هايحصد ثمرة حلوة
و اللى هايسيب النبتة تكبر بالبركة و زى ما تيجى تيجى ، ما يزعلش لما يحصد ثمرة معطوبة
متفقين ؟؟