حكايه توته وميدو
من وهي طفله بيسألوها هاتتجوزي مين لما تكبري ياتوته ؟
مع انهم كانوا بيسألوا ميدو هاتتطلع ايه لما تكبر ياجحش ؟
وبالطريقه دي شكلوا حلم كل واحد فيهم ....
هو هايحلم يالنجاح ويموت نفسه علشان يحققه ،
وهي هاتحلم بالراجل وتموت نفسها علشان تلاقيه .
ميدو خلص جيش والأهل قلقانين علشان لسه ملقاش شغل ،
وتوته خلصت جامعه والأهل قلقانين علشان لسه ما لقتش عريس ،
الخوف علي ميدو إيجابي لانه هايدفعه يدور علي شغل وينجح ،
لكن الخوف علي توته سلبي لأن مفيش بايديها حاجه غير انها تصاحب يمكن تلاقي عريس ،
ميدو عدي التلاتين وهو عايش حياته لانه قدر يشتغل اي حاجه ،
توته عدت التلاتين وهي بتموت لانها لسه ما اتجوزتش .
ميدو فى الاخر اتجوز توته وعايش حياته ، شغل وأصحاب وجيم وروشنه ،
توته عماله تطوف حوالين ميدو اللي من غيره مفيش حياه .
والنتيجه :
- توته عايشه مرعوبه ( هايخوني - هايتجوز - هايسيني - مبقاش مهتم بيا - مبقاش يقول كلام حب - اتغير )
- ميدو عايش مخنوق من الحصار و حاسس ان حبه ليها واهتمامه بيها واجب مفروض عليه فبيعمله مضطر وعلشان يطمنها ،لكن من جواه نفسه يعمل عكس كل ده .
ياتوته صدقيني ميدو جزء مهم من حياتك ، لكن مش حياتك كلها ،
معنديش مانع ترتبيه ف اول احلامك بشرط انك ترتبي بعديه، احلام كتير مهمه ،
تستمتعي بيها وتأكدي لنفسك انك إنسان كامل مش نص إنسان،
ولو ماجاش من اصله اديكي عايشه احلامك وحياتك .
رتبي ياتوته احلامك صح ومترهنيش وجودك بوجود ميدو ،
وبعدين ياهبله فيه واحده تتجوز راجل اسمه ميدو !! جتك خيبه
cpd