[walaa farouk]

يتشرف السيد المسيح بدعوة حضراتكم لحضور العرس السماوي لأبنه المبارك التايب
تخيل معايا اورشليم بتفتح بابها عشانك و كل صفوف السمائين حاضرين و محدش غايب
و قبل ما تخبط بأيدك يجي ملاك اسمه الكاروبيم يفتحلك الباب روحك تخطي في السما خطوة ومن فرحتك مش مصدق و قلبك طاير ودايب
يا بختك ياللي فرحك هيبقي في السما طوباك ياللي هيبقي ليك في السما نايب
و مع تاني خطوة تخطيها تلاقي في استقبالك الملاك ميخائيل
يناديك بأسمك ياخدك في حضنه يحط في ايدك خاتم جميل
زي حكاية الابن الضال و ابوه و فرحه اللي كان ملهوش مثيل
اهو فرح السما أجمل منه و أجمل مليون مره من عرس قانا الجليل
و مع تالت خطوة تخطيها
تلاقي صفوف الملايكة جنود
ماسكين دفوف دهب في ايديها
و ريحة المكان تبقي بخور و حنوط
و 24 قسيس واقفين و تيجان لابسين رمز الكهنوت
يقولوا مبارك الأتي بأسم الرب تلاقي الكل بيعمل ماطنية سجود
و مع رابع خطوة بتشميها
يفاجئك المكان بحلاوة بخوره
أستير بتفرشلك عالأرض ورد جايباه من قبر المسيح لسه فيه ريحة عطورة
و خطوة خمسة منك كمان
تشوف داود واقف في ملئ نوره
صوابعه تقرب من قيثارة أوتارها في استقبالك بتعزف لحن ابؤرو
و يجي لغاية عندك الروماني
مارجرجس بيقرب منك و جايبلك في ايده حصان
علشان تبقي فارس زيه و يحكيلك عن سيدك زمان
ان كان يسوع دخل اورشليم القديمة بجحش ضعيف ابن أتان
فده عشانك لما تيجي تدخل الملكوت تدخل بحصان أبيض جميل رهوان
و الخطوة الستة ماتتنساش
العدرا بجمالها يا عيني عليها
تشيل الشال الأزرق من علي راسها و تلبسهوك زي البدلة بأيديها
وتلمس راسك و تباركك و تباركلك و دموع الفرحة تملي عينيها
و زي ما بيعملوا في اكليل الكنيسة تمسك ايدك و تسلمك بايديها للي فاديها
و الخطوة السبعة يعني الكمال
يعني يسوع
و فاتح حضنه ليك
أروع جمالا من بني البشر
أجمل حاجة تشوفها عينيك
و أنت من المفاجأة ماتبقاش عارف تحضنه و لا تسجدله و لا تلمسه بأيديك
تلاقي كل أعمالك تتحول و تبقي قارورة طيب و زي مريم أخت مرثا أمد راسي امسح رجليك
و أقولك يا اللهي ها هوذا العطر قربانا لروحي اسكبه عند قدميك
مش قادر أنطق خلاص ولا قادر الاقي كلمة توصف جمال المسيا
أجمل فرح في الدنيا عشته و شفته بعنيا
لو أنت غرقان لشوشتك و تايه في بحر الخطية
خلي جواك ايمان انك تقدر بيسوع تدوس وتمشي عالمية
و زي ما عزمتككم علي فرحي انهارده نفسي تعزموني علي فرحكم اللي في السما لكن بعد التوبة و الرجوع
وأن كان شعري و كلامي سمكتين فأنا مؤمن أن يسوع هيبارك و يتوب الخمس ألاف و يرجع باقي الجموع
و زي يوحنا الحبيب ما ختم سفر الرؤيا هختم معاكو و أقول أاامين تعالي أيها الرب يسوع