انا مرّه سمعت بودني خادمه في المهرجان " الروحي " بتقول لاطفالها في الخدمه :
بعد ما اصحح الامتحان هحُط الشاطرين مع بعض و الخايبين مع بعض عشان كل واحد يبقي مع اللي شبهه !!!
ومرّه وقفت اتكلم مع مجموعة بنات رافضين يحضروا الافتتاحيه لانها - فعلاً - ممله جدا ! ،
حاولت اوصلُّهم ان الفكره فكرة التزام و اني بعُّد مع بابا يسوع كل وقت مش لمّا يبسطني بس و البنات وقفوا يسمعوا بشكل خلاني اكمّل كلام ، لحد ما جت تاسوني ما و لقيتها بتقولي مينفعش تلمّيهم حواليكي كده !
مع العلم اني لو ملمتهُمش حواليّ كده جوه الكنيسه محدش هيعرف يلمُّهم من الحوش او الشارع !!
كنت قاعده علي السلم بتاع الكنيسه من فوق و علي اول درجتين في السلم قاعد طفلين و الخادم بتاعهُم
فجأه لقيت الخادم بعد ما اكل شئ ما ، راح مادد ايده بالورقه للمخدوم و قاله : روح ارميها !! الولد مرضيش يمد ايده ياخدها و قال لا !
راح الخادم اخدته الجلاله اوي و قاله : الطاعه! و راح ماسك ايد الولا و حط فيها الورقه و قاله روح ارميها !
الولد راح و رجع و هو وشه في الارض !
انهارده بتكلم مع بنت لقيتها بتقولي حصل كذا كذا و تاسوني حرمتني من كذا و قالتلي متدخليش الكنيسه ! و انا مش هدخل الكنيسه و مش هروح الخدمه تاني ابدا !
و فشلت كل محاولاتي في اقناعها انها متربطش بين شخص المسيح و تصرفات خدّامينه !
احنا محتاجين حاجه اسمها " اختبار عقليّه " للخُدّام ..
اللي بيربّوا للكنيسه ولادها
هو في ام عاقله ممكن تسمح لحد مش عاقل يختلي بولادها ؟!
لو اللي بيربّي مش عاقل النتيجه علي المدي البعيد هتبقي مُحزنه !
يبقي نعمل اختبار ، و بعد الاختبار
انا اول واحده مستعده تُقعُّد في البيت ..
اشرف و اكرم الف مره
من انّي في يوم اوصّل مخدوم لانّه يسيب الكنيسه و ميدخلهاش تاني .