شكراً يا مارى
ومازلنا مع المواضيع المميزة الراقية لمريم ميرو
1-اسمك المستعار
مفيش اسم مستعار وناصر اسمى الحقيقى
2-سبب اختيارك لهذا الاسم
هو زمان كانت والدتى قالتلى ان الناس كانوا بيقولولها انت سميتيه ناصر على اسم جمال عبد الناصر لكن هى قالتلهم أنا سميته ناصر على اسم يسوع الناصرى
3-الهوايات
كرة القدم وتنس الطاولة والقراءة
4-أفضل شهر فى السنة والسبب
أحب شهر يناير علشان عيد ميلادى وبداية السنة الجديدة وبأحس ان العالم كله بيحتفل بعيد ميلادى
وكمان بأحب فصل الشتاء جداً لأنه فصل وقور ومحترم بعكس الصيف
5-حلمك فى الحياة
الستر والصحة وراحة البال لجميع أفراد الأسرة
6-أجمل سنوات مرت عليك
أيام الجامعة وأيام الخدمة
7-شخصيتك(عصبى رومانسى...)
أنا هادى وخجول جداً ورومانسى جداً جداً
لكن ده ميمنعش ان فى بعض الأوقات باكون عصبى لكن فى كل الظروف الهدوء مطلوب
8-أجمل بلد زرتها
الإسكندرية مدينة الذكريات
وعبد الحليم بيقول:يا أحلى شمس وأحلى رمل وأحلى ميه..جايين على نسمة أمل نرتاح شوية
9-لونك المفضل
اللون الأبيض علشان أنا زملكاوى(لون فانلة الزمالك مدرسة الفن والهندسة)
وكمان اللون السماوى لون السما
وكمان اللون الأخضر لون الملاعب
10-مَن هو مثلك الأعلى
أستاذى ومعلمى فى مدارس الأحد زمان من ابتدائى وحتى دخولى الجامعة وتخرجى وكان أمين الخدمة أيضاً بتاعنا قديس القاهرة المهندس بشرى يسى
11-ماهى حكمتك بالحياة
+العتاب بين الأحباء صابون القلوب
+يا بخت مَن سامح
12-ما الذى يحزنك
أوقات كتير مش بالاقى من الناس نفس المعاملة الراقية اللى بتعامل بيها معاهم وده شىء بيخلينى أحزن واخد فى نفسى
13-ما الذى يغيظك
اللى بيحصل فى الفضائيات..ليه؟ ناس بتقدم برامج فى الفضائيات زى لاعبو الكرة والفنانين وغالبيتهم جاهلين وعمرهم ما قرأوا كتاب بالإضافة لتدنى أخلاقهم مثل ما فعلى المدعو شوبير مع الراجل الطيب أحمد الطيب الرجل الخلوق..وفى نفس الوقت خريجو كلية العلام قاعدين فى بيوتهم ومش لاقيين شغل
14-ما الذى يفرحك
لما أشوف الناس فرحانة
15-أفضل شخصية فى رأيك
البابا تواضروس
(حكيم ومنفتح وروحانى ومثقف)
16-نفسك تقول ايه لربنا
يارب سامحنى واغفر خطاياى
17-مَن هم الأعضاء اللى تتمنى تشوفهم
أنا الوحيد اللى شفته وقابلته من المنتدى
هو أخى الحبيب الأستاذ رامز والمكان كان فى فرح داخل الكنيسة وكان أسعد أيام حياتى انى اقابل أخى رامز الشخصية الجميلة
وأتمنى اشوف بقية المنتدى فى القريب العاجل عندما تسمح الظروف
18-عضو عجبتك صورته الشخصية
كل صور الأعضاء جميلة
19-عضو نفسك تغيّر اسمه
مفيش
20-عضو نفسك تعتذر له
مفيش
21-عضو نفسك تقوله(برافو عليك)
رغم ان الجميع بيقدم كل شىء جميل ومواضيع رائعة لكن هاتفضل أختنا مارى نعيم هى الزهرة الجميلة..وتُقاس عظمة الأشخاص على مر العصور بمدى الفراغ الذين يتركوه فى المكان والناس بتحس بيه(انظروا لما مارى بتغيب يومين على بعض من المنتدى كلنا بنحس ببعض الاهتزاز والفراغ فى المنتدى)ودى كلمة حق لازم تتقال
22-ما هو رأيك بالحب
الحب هو الحياة ولا حياة لمَن لا حب له ولا يوجد غير كلمات الشاعر العربى الكبير نزار قبانى على لسان عبد الحليم فى رائعته قارئة الفنجان:
...فبرغم جميع حرائقه وبرغم جميع سوابقه وبرغم الحزن الساكن فينا ليل نهار وبرغم الريح وبرغم الجو الماطر والإعصر..الحب سيبقى أحلى الأقدار
وأنا أضيف:عندما تعيش الحب الحقيقى فلن تشعر بالملل.ولن يطرق الحزن بابك أبداً
عندما تنام كل العيون تبقى عين الحب سهرانة
23-صف نفسك بكلمتين فقط
أنا طالب علم فى مدرسة الحياة اتلقى فيها دروس السعادة والشقاء
أنا بالنسبالى أيام الشقاء اكتر...لكن مع المسيح أفضل أيامى القادمة
24-ما هو الشىء الذى ندمت على عمله
أنا مش فاكر وف أوقات كتير الواحد كان بيتخذ قرارات ويندم عليها والحياة بتعلمنا حاجات كتير
وامتحان المدرسة كل سنة لكن امتحان الحياة كل يوم
25-كلمة تمنيت ان تستطيع سحبها
مفيش
26-آخر شخص تتذكره قبل أن تنام
المسيح والعذراء من خلال الصلاة
27-جريمة تتمنى لو تستطيع ارتكابها
مفيش
28-حمامة زاجل حاملة رسالة لك..من مَن تتمنى أن تكون؟
القديس العظيم أبى سيفين
29-شخص لطالما حلمت به
والدتى
30-دمعة انذرفت رغماً عنك
الدموع نزلت كتير
لكن اللى أنا فاكره بالترتيب
1-بكيت يوم وفاة والدى وكنت صغير فى رابعة ابتدائى
2-بكيت يوم رحيل عبد الناصر وكنت صغير فى خامسة ابتدائى ولبسنا شارات سوداء فى المدرسة والكل كان بيبكى تلاميذ وتلميذات ومدرسين ومدرسات
3-بكيت يوم رحيل عبد الحليم وكنت فى الثانوية العامة وهو مطربى المفضل وكمان كنت من ضمن ال2 مليون اللى ساروا فى جنازته الأسطورية
4-بكيت يوم وفاة والدتى من 11 سنة
5-بكيت يوم نياحة البابا شنودة وتحديداً ساعة وصول الجثمان دير الأنبا بيشوى ومشاهدة الجموع الغفيرة فى الدير
31-موقف صدمك ولن تنساه
يوم وفاة والدتى
32-شخص تتمنى الانتقام منه
مفيش
33-شىء أو عمل لا تستطيع مسامحته
السادات ومبارك وما فعلوه بمصر وهما السبب فى ما وصلنا اليه
السادات:والفتن الطائفية اللى حصلت فى عهده
مبارك:ترك سيناء للجماعات الارهابية والفساد وغيره
34-شىء أو شخص غيّر مجرى حياتك
القديس العظيم البابا كيرلس السادس
35-حلم لا تستطيع تحقيقه
أن تكون مصر قطعة من أوربا فى ايجابياتها
36-كلمة تود سماعها كل يوم
الرب يحفظ خروجك ودخولك من الآن وإلى الدهر
(مزمور8:121)
37-طالع رحلة برية مَن تأخذ معك
المنتدى كله
38-غرق المنتدى ومعك قارب ما يشيل إلاّ ثلاثة مَن تأخذ معك
المنتدى عمره ما يغرق وربنا يحافظ عيه
لكن لو حصل أهم ثلاثة عندى جهاز الكمبيوتر والمحمول وذكرياتى فى المنتدى اخدهم معايا ومليش دعوة بحد تانى ههههههههههههههه
اختار مريم ميرو