[walaa farouk]

🙏💝❤🌷💐🌾

- أصر أحد الخدام إنه يروح معانا خدمة إخوة الرب في الصعيد ، وجه فعلاً ..
- اختاروا له بلد يوزع فيها ، وأصر الخادم إني أكون معاه ، حاولت اهرب منه لأني عرفت حالته .. ما نفعش ..
- رحنا كذا حالة ، كنت بأتكلم وأشوف الحالة ، وخليته هو يوزع البركة
_ لغاية حالة أرملة عجوزة مش بتشوف ، الخادم اللي من البلد خبط على الباب ، ردت :
- انت جيت يا ابن ربنا ، تعال ، انا حلمت بيك امبارح ..
- قال لي : ادخل يا عم ، اكيد انت ابن ربنا مش أنا ..
- سمعته الست ، وبعدين انا كلمتها شوية من الإنجيل ، وهو إداها البركة
- فقالت له : انا سمعتك بتقول انك مش انت ابن ربنا
إيه رأيك ، انا ما بشوفش ، بس انت غالبا اللي ابن ربنا
- رد عليها : لا يا ستي ، انا عارف نفسي ، انا ابن الشيطان ، وبعيد قوي عن ربنا ..
- اجابته : لا يا ولدي ، انا شفت الحلم ، ان ابن ربنا ها يديني بركة ، وانت اللي اديتهاني ، تبقى انت ابن ربنا
قرّب يا ولدي وسلم عليّ ..
- اقترب منها ، وسلم عليها ، راحت قبّلت إيده ..
- سحب أيده وهو بيصرخ ، وحسيت انه جسمه قشعر : إيه اللي بتعمليه دا يا ست ، انا خاطئ ، انا وحش ..
- قالت له : انت ابن ربنا .. وخادم ربنا .. وبركة ..
- وإحنا راجعين في القطر ، جه جنبي ، وقوّم اللي كان قاعد ، وقال لي : عايز أتوب ..
- رديت : طيب في وقت تاني ، انا عايز انام ، والرحلة ٨ ساعات ، بكره روح لابونا وتوب
- زعق فيّ ، وقال : انت عارف .. الست دي ، من ساعة ما باست إيدي ، وانا حاسس بنار في جسمي ، انا دخاني في الشهر يعمل حوالي ١٠٠٠ جنيه ، غير المزاج ، انا ها ابطل التدخين ، وكل شهر عاوز أوزع تمنه على الغلابة ، والأرملة دي
- ماكنتش مصدق ، وكنت فاكر انها نزوة روحية جميلة ، راضيته ، ووافقته عشان يسيبني انام
- الكلام ده كان في ٢٠٠٧
حالياً هو خادم في دولة أفريقية ، ورسالته البحث عن المحتاجين
عيّد عليّ في الكريسماس ، وحكى لي إنه راح الهند ، وبعض الدول اللي نفسي اروحها ، سبقني بكتير ، وخلاني فرحان ، بالذات لما قال لي :
مش ناسي الأرملة اللي خلتني أعرف ربنا وأتوب وأبقى خادم
مش ناسي اللي وأنا باديها بركة إديتني الحياة الابدية
هذه ثمرة أقدم لله الشكر عليها في نهاية ٢٠١٥
كنت شاهداً على عمل الله فيها
وياريت كلنا نشكر ونشهد ونفرح بالثمر لمجد الله .