منتدى الفرح المسيحى - لحظات محسومة {نازفة الدم}

https://upload.chjoy.com/uploads/167788232407661.jpg
بنشوف منظر غريب ساعات نقف قصاده متعجبين
لما يكون بيت مهدوم خربان ومتشرخ وطالع منه زرع اخضر

في الكتاب المقدس كان في أمراه فضلت تنزف 12 سنه ضاع شبابها في الجري
ورا الدكاتره ومفيش أمل
كانت بحسب الشريعه ووقتها نجسه يعني محدش يحب يتعامل معاها
كم احساس الغربه وهي في وطنها وعيلتها
كم احساس الألم والمراره

اكيد كانت كل يوم بتقوم تجر في رجلها ومش عارفه ازاي تعدي يومها
اليأس مالي حياتها ومش عارفه ذنبها أيه في شكل حياتها اللي تكون وبعد الناس عنها
بدل ماتلاقي اللي يطبطب ويهون عليها بقيت وحيده

سمعت عن يسوع أنه بيشفي لملمت نفسها وجريت عليه
في وسط الزحمه الجامده عرفت بس تلمس حته من هدومه
ونالت الشفا

يمكن تكون زيها بقالك عمر من عمرك ضايع
مستنزف وتعبان ومتالم ووحيد وحاسس ايه ذنبك
وتكون شبه المبني الخربان المتساب

بس صدق ان ممكن بعد عمر في لحظه كله يتغير
ويخرج من حياتك اللي باينه مشققه الشفا والجمال كله
وزي مكنت مستغرب عملت ايه عشان يبقي شكل حياتي كده
هاتشوف استغراب الناس علي حياتك وهي بتقول ازاي فجاءه حياته بقيت كده

صدق في الله
ارمي نفسك عليه واستناه لسه في لحظات محسومه عنده في يوم هاتيجي