منتدى الفرح المسيحى - لن تُمتَهَن و لن تُحتَقَر و لن تموت

https://upload.chjoy.com/uploads/166953800221041.jpg

الشياطين : أن الأوان و خسرتوا الرهان أن الأوان تسدلوا الستار

الملايكة : بالعكس! .. آدم برئ .. آدم مقتلش

الشياطين : آدم لأنه جبان قتل نفسه
.. انتحر بمحض إرادته .. لما كفر بالشئ اللي ميزه بيه ربه ،، عقله 🧠
عقله كان تفاحته ، ولما حس بجوع و خواء .. أكله !!
و بكده اتحكم عليه أبداً مايشبعش .. يفضل جعان لآخر الزمان

الملايكة : أبداً .. أبداً .. محصلش
أدم بيناقش نفسه .. أدم بيصحح وضعه .. أدم بيحارب طبعه
و هيكسب حتماً معركته
و متنسوش إن التفاحة الفاسدة ممكن تعدي بقية السلة ..
و قاسم بتاعكم كفيل إنه يفسد قرطة

الشياطين : لسه بتقاوحوا.. آدم قدامكوا أهو ! إسألوه .. آدم عبد ربه.
.. إيه رأيك في نفسك دلوقتي يا همام ؟

آدم : مين اللي بيسألني؟؟ .. أنا اللي بسأل دلوقتي وعايز حد يجاوبني
أنا أبقى مين!!

الشياطين : جبتك يا عبد المعين !!

الملايكة : إنت الإنسان .. مخلوق من طين .. لكن جميـــل

آدم : إدوني أمارة .. إدوني دليل

الملايكة : إنتَ الأمارة و إنت الدليل

آدم : ادوني مراية اشوف فيها حقيقتي
انا بصيت في مرايتي ماشفتش غير قُبحي و دمامتي
.. و عرفت المصير

الملايكة : إنت المراية .. و إنت الأميــر
و الدليل إنك المخلوق الوحيد اللي وعيت انك مش كامل.
.. و عشان تنشد الكمال .. لابد تتعذب و تناضل

أدم : ولحد إمتي هأفضل أتعذب و أعاني

الملايكة : يا راجل .. حد طايل يعيش هذا العذاب النبيل

أدم : أاااااه .. هذا العذاب النبيل
أااااااه .. ماهو اللي ايده ف الميا

الملايكة : مفيش جديد ممكن نقولهولك
.. غير اللي قولته في يوم لروحك
افتكر أول قصيدة قولتها ف حياتك

أدم : لأ .. معودتش فاكر

الملايكة : يا إنسان العصر .. يا سيد هذا الكون .. عمرك بلغ مليون و أمجادك .. تفوق الحصر
انطلق.. فى طريق الشوك … شارك .. مرفوع الراس... عالى الجبين .. مضموم القبضة... ولا تتقهقر … تذكر دوما

لا تكذب .. لا تفتن .. لا تغضب .. لا تحسد
.. لا تسرق .. لا تطمع .. لا تخن .. لا تسئ الظن .. لا تقتل
#لا_تضعف

ادم : إفتكرت....

- لن تُمتَهَن إلا إذا توسَّلت،
و لن تُحتَقَر إلا إذا تلهَّفت،
و لن تموت إلا إذا انبطحت أرضاً و زحفت
- فكن جريئاً و لكن لا تتهوَّّر
كن شجاعاً و لكن لا تتجبَّر
كن صبوراً و لكن لا تتململ
كن كل شيء و لكن تذكَّر... أنك إنسان
- إحترق قوةً و ضعفاً و تعذَّب،
إحترق مرضاَ و صحةً و تغلَّب،
إحترق ألماً و لذَّةَ و عِش... هذه هي الحياة