منتدى الفرح المسيحى - ليه يارب

https://upload.chjoy.com/uploads/166859194592961.jpg

جربت احساس انك تشوف فشلك وضعفك
قدام عينك ومش قادر تتحرك أو تعمل حاجة..
وأنت واقف مشلول مش قادر حتى تفكّر في بكرة ..
والسبب ايه !؟؟

انك سلمت حياتك لربنا ..

وعدك بتعويض على كل لحظة عشتها بس سابك تمشى الطريق كله لوحدك
وعدك بصورة وحياة بعيدة تماماً عن اللي أنت بتعيشه دلوقتي ..
حط جواك حلم من ساعة ما حلمته والدنيا كلها ماشية عكسه بالظبط.

لو انت عايش اللى فوق كمل معايا اللى تحت 👇

يوسف..
حياته كانت سهلة وعادية جداً.. يوسف كان مرتاح جداً..
ابن ابوه زي ما بيقولوا .. متدلع .. قميص ملون
.. وكل اللي بيحلم بيه اي حد!
حياة متروق عليها من كل اللي حوليه
.. مش محتاج اضافة هو كدة تمام ✨👌

لحد ما بس ربنا بعتله الحلم، ومن ساعتها وحياته اتقلبت !!

كراهية اخواته .. لبير .. لعبودية .. لظُلم .. لسجن ..
لسنين عمالة تضيع من عُمره مش بينجز فيها حاجة ..
أنت متخيل أن أهم وأحلى فترة في حياة يوسف قضاها في السجن !؟.
من وهو عنده ١٧ سنة لحد ٣٠ وهو مسجون ..

من الاخر اللى عايز اقوله .....
ربنا هدفه " انت " .... مش هدفه الفلوس
ولا انك تنام فى قصر على ريش نعام
ولا حتي تشتغل مدير لاكبر شركة فى العالم ..
ربنا ليه هدف لحياتك .. ممكن يسيبك تتظلم
و ممكن توصل لانك تتسجن
علشان يجهزك لتعويض عظيم
.. ساعة ميدهولك تكون قادر عليه ✨❤