صبحية مع الربّ

كل التسبيح وكل المجد وكل الشكران بيلق فيك يا إلهنا الحبيب.

يا ربّي يسوع، كتير منهرب ومنتهرّب من مواجهة حقيقة ذاتنا اليوميّة متل ما عملو الكتبة والفرّيسيين اللي كانو مفكّرين بالعجايب والآيات.

بس إنت يا ربّ، بتشيلنا من الوهم اللي بتعيّشنا فيه الخطيّة، وبتحطّنا قدّام الحقيقة الثابتة واللي ما بتتجزّأ وهيي إننا نموت عن الإنسان العتيق تا نقوم معك، من خلال الموت، لحياة جديدة.

يا ربّي يسوع، إنت اللي علّمتنا إننا نحنا مارقين بهالحياة مرور الطريق، وما لازم نشتغل على إننا نتجذّر بالعالم، لا بل نكون بالعالم بس مش من العالم وشهواتو.

يا ربّي يسوع، نحنا منآمن إنّو معك بيصير الموت هوي معبر مننتقل فيه للحياة، ومن دونك ما في حياة ساعدنا على إننا نعبر دايماً بشوق لعندك.
آمين.
(الخوري يوسف بركات )