منتدى الفرح المسيحى - شايف عناية الهي قصادي

https://upload.chjoy.com/uploads/165947365637291.jpg

حاسس بضعفي بكل الوضوح
لكني بطبعي ماحبش أبوح
خصوصًا إني من القلب راضي
وشايف عناية الهي قصادي
وزي الليالي اللي فاتت
مسيرها تفوت الليلادي
وبعد الظلام الشديد
يطلع نهاري الجديد
ويدخل شعاع الصباح
جوه بيتي لغاية السرير
يطبطب عليَّ بملمس حرير
وفجأة تهل عليَّ النسايم وريحة الزهور
وتصحى البلابل وتصحى الطيور
ترفرف وترقص وتفضل تدور
تصوصو وتعلن عليَّ السرور
واسجد وأصلي واشكر يوماتي
وقبل مابختم صلاتي
تغمرني ريحة البخور