منتدى الفرح المسيحى - يوحي بالكلمة

https://upload.chjoy.com/uploads/165504708950521.jpg

في انتظاري لكلمة من الله، بانحني قدام كلمته المقدسة واستناه ..💜

واسأل نفسي هو أنا لحد فين مصدق إن كلمته "هتكلمني أنا" فعليا؟! ..🤷‍♀️
👈ووراها سؤال لحد فين مصدق إن كلمته "هتناسب" ظروفي واحتياجي .. هتناسب زماني أصلًا ..🙌
👈واتجرأ وأقول لحد فين مصدق إنها "كلمته" أصلًا ..🙈

وبالمنطق فكرت ..👇

هاصدق إنها "كلمته"، لو هي مش كلام تاريخي أخلاقي مكتوب في أزمنة سابقة وأماكن مختلفة،
👈إنما "كلمته" هي صوت شخص حي مش محدود بحدود الزمان والمكان .. اللي هو بالتاكيد شخص الله ..🙌

أكتر من ٤٠ شخص مختلفين إجتماعياً وفكرياً وثقافياً كتبوا لينا الكتاب المقدس اللي في أيدينا ..
لكن المشترك بينهم إنهم كانوا "مسوقين" من الله "أقنوم الروح القدس" عشان يوصلولنا "كلمته هو" ..☺️

الروح القدس أوحى للكاتب بالكلمة المقدسة
📍مش معناه إنه بيعرفه "بس الموضوع" اللي هيكتبه
، ويسيبه هو يعبر ويكتب براحته من غير تدخل منه ..
📍ولا معناه إنه "بيلهمه" باللي يكتبه زي الشعراء ومؤلفين الروايات ..
📍ولا برضو معناه إنه كان "بيمليه" كلمة كلمة وحرف حرف ..

👈انما ..
📍زي ما بطرس قال:
"لأَنَّهُ لَمْ تَأْتِ نُبُوَّةٌ قَطُّ بِمَشِيئَةِ إِنْسَانٍ، بَلْ تَكَلَّمَ أُنَاسُ اللهِ الْقِدِّيسُونَ مَسُوقِينَ مِنَ الرُّوحِ الْقُدُسِ." (٢ بط ١: ٢١).
📍وزي ما بولس قال:
"كُلُّ الْكِتَابِ هُوَ مُوحًى بِهِ مِنَ اللهِ،.." (٢ تي ٣: ١٦).
وكلمة "مُوحًى بِهِ" معناها "أنفاس الله" في الأصل اليوناني، يعني الوحي هو إرشاد وسيطرة شخص الله الروح القدس على كل اللي شارك في الكتابة عشان يقدموا الحق الإلهي "كلام الله" من غير خطأ بشري .. 👌

الروح القدس كان بيستخدم الأساليب المختلفة من كاتب عن التاني بتميز .. يعني برغم إننا بنشوف داود يكتب بلغة الراعي، وسليمان بلغة الحكيم، وبولس بلغة الفيلسوف، وغيرهم كتير ..
مش بنلاقي أي تناقض أو تضارب لكن بنشوف إنسجام كامل وتوافق تام ..
وفي نفس الوقت الروح القدس بيساعد الكاتب على انتقاء الألفاظ المناسبة ..

وساعات كان الروح القدس بيكشفله حاجات مخفية عنه .. زي ماكشف لموسى عن الخليقة مثلًا..

👈بمعني أشمل أن الكاتب أثناء الكتابة بيكون تحت هيمنة الروح القدس اللي يحفظه ويعصمه من أي خطأ أثناء الكتابة ..🙌

👈ومن هنا باتملي يقين أن الكلمة اللي بين أيديا هي كلمته .. صوته .. أنفاسه ..

باشكرك ياروح الله علي كلام الله الغالي .. و باسجد بإجلال قدام كلمتك وأنا باشوفك وباسمعك بتكلمني فيها بشكل شخصي ..🙌💜

#شريكي_الأعظم