منتدى الفرح المسيحى - يعز النكد زي عينيه

https://upload.chjoy.com/uploads/165222001286161.jpg

هو كده ، تركيبته كده ، السوفت وير بتاعه كده : نكدي !!

اول ما يلاقي حاجة باسطة الناس تجيله الحالة :
" ازاي ده يحصل و انا موجود ؟؟"
علي طول لازم يحط التاتش بتاعه و يجيب درفها !!
و تلاقي ده في صورة تعليق ، تصرف ، قرار .
. المهم يقضي علي "فتنة السعادة" في مهدها !!
شعاره : يعني ايه الناس تبقى مبسوطة ؟؟
لازم اطربقها و اجيب عاليها واطيها ..
لو كانت قاعدة حلوة يبقي ننهيها علي طول !
لو ناس بتضحك يبقي نقلب الحديث علي حاجة تعيسة !
لو حديث جميل نفكرهم و ننكد عليهم أن بكرة "
عندنا شغل أو مدرسة " و لازم نمشي في الحال !!

لاحظ حتي و انت بتقرا اي بوست علي الفيس
، تلاقي الناس كلها كاتبة تعليقات جميلة
، و تلاقي الأخ "متضايق" ده لازم يطلع لك ما تفهمش منين و يرمي لك شوية نقد علي هم علي هجوم ، المهم يجعله "مش عامر" !!

و الأخ نكدي ده مشهور في المتدينين "الشكليين" ، اللي يعز التعاسة زي عينيه ، الإبتسامة عنده حرام ، و الضحك هو "الزندقة" و ترك الايمان المستقيم ..
التكشير شعاره ، و المواعظ التعيسة تخصصه ..
وظيفته منين مايروح انه يوقف اي شيء مفرح مهما كان بسيط و نقي تحت شعار "النكد التام او الموت الزؤام" !!

ابتعدوا عن النكد و النكديين ، فالفرح و السعادة سر جمال الدنيا ..