منتدى الفرح المسيحى - طفشتهم و ارتحت

https://upload.chjoy.com/uploads/16514786502471.jpg

فيه ناس كده ، تركيبتهم كده ، ما يرتاحوش غير لما يطفشوا اي واحد ناجح و متفوق و متميز..
بيخافوا منه علي نفسهم و علي نجاحهم ، و كأنه بياخد من حياتهم و يعيش هو !!

اول ما يلاقوا حد "نوّر" حبتين ، يداروه و يطفوه و يفشلوه و يحطموه و يطردوه ..

يحرموه من اي فرصة لإظهار نجاحه ، و يحاربوا فيه لغاية ما يزهق و يطفش و يختفي ..

و الغريبة عمرهم ما بيحسوا انهم غلطوا، بالعكس بتيجي لهم نشوة الانتصار الكاذب انهم تفردوا بالنجاح (الوهمي) اللي هما فاكرين انهم حققوه..

و بعد ما يطفش الناس دول يكمل شوية في راحة كدابة،
و بعدين يقعد زي "البومة" ينعق لوحده في الخراب اللي عمله
بعد ما طفش الكل من حوله : يعني يخربها و يقعد علي تلها !!

و فيه ناس شبعانة و قوية ، تفرح بتشجيع اي موهبة و لو صغيرة ،
و تدي فرصة للكل ..
عارفة ان نجاحها يزيد بنجاح اللي معاها و اللي حواليها ،
و عارفة ان نجاح اللي معاك يضاعف نجاحك ..

النجاح منظومة يفرح فيها الإنسان الواثق من نفسه بأنه يجمع أصحاب المواهب و التميز حوله ..