‏فيه جملة بتقول :
It Costs You Nothing to Be Kind ..
مش هتتكلف حاجة لو بقيت طيب ..

الصراحة الجملة دية في غاية الاستفزاز ، فتعامُل الناس مع الطيبة انها حاجة سهلة او عادية فيه قدر كبير من السطحية و السذاجة .. لا طبعا ، ان الانسان يبقي طيب ديه حاجة مكلفة جدا ؟! فهو بيجاهد قصاد ‏غرائز كتير زي الـ ego او حب السيطرة و التملك .. بيمشي عكس التيار السائد و يضحي بدفء القطيع ، بيلتزم بقانون اخلاقي بشكل صارم بينه و بين نفسه قايم علي مفاهيم معادش ليها وجود زي الوفاء و العطف و المحبة .. كل ده ممكن يخسره حاجات كتير زي مكاسب مادية او مناصب اجتماعية .. !
‏.. فالطيبة تكلتفها غاليه اوي ، و عشان كدة مش كتير بيقدر يدفعها .. العالم بيتعامل ان زبونها يا اهبل يا مجنون ! .. تجارة خسرانة !! حيرجع عليه بايه لما يضحي بكل ده و يقاوم و يجاهد ذاته عشان يبقي طيب ؟!!!

.. فيه انسان بيمارس الطيبة عشان نزعة دينية جواه و المقابل بالنسبة له في ‏حياة بعد الموت او تعويضات ألهية ، فيه انسان بيمارس الطيبة عشان قناعة مجتمعية جواه انه لو بقي طيب علي الاخر ، الاخر حيبقي طيب معاه .... و فيه اسباب كتير ممكن تمنطق الطيبة ، بس في وجهة نظري اعظم طيبة هي اللي ملهاش سبب غير ان صاحبها مجنون !!

فالعالم في اشد الحاجة لهذا الشخص ‏المجنون ! اللي بيمارس الطيبة لاجل الطيبة ! اللي مش عاوز من وراها حاجة ... إنما هي الحاجة و الهدف ! .. فالطيبة بالنسبة لهذا المجنون هي الفاس اللي بيكسر في جمود المجتمع المنافق المزيف .. الطيبة هي المنفذ الوحيد لروحه من بؤس و جشع المادة ... الطيبة هي الإجابة اللي ملهاش سؤال ‏السعادة اللي مبتخلصش .. النور الخافت اللي قادر ينور اي ضلمة ... الطيبة هي صرخة الانسان المجنون في وش الظلم و الخوف و الألم ...

مشاركة جميلة جدا
ربنا يبارك حياتك