منتدى الفرح المسيحى - ابو طقة جنان

https://upload.chjoy.com/uploads/1640945306941.jpg

فيه في الناس كده ، و كتير فوق ما تتصور (!!) ،
عايشة حياتها بنظرية "الطققان" ..
و الكلام ده في البيت و العمل و حتي في الخدمة ..
و الطقة دي في المواضيع الكبيرة و حتي الصغيرة ..

زي الطفل غير الناضج، اهو اي طقة و السلام
، الفكرة اللي تعدي علي باله يقولها ،
و القرار اللي يروق له يعمله و زي ما تيجي
، و الكلمة اللي تعجبه "يدبها" و زي ما يحصل يحصل ..

و الكارثة ان الأخ (او الاخت) "طاقق" او "طاقّة"
ده ممكن مش بس يضر نفسه ، ده يضر ناس معاه ،
و هو و "رزقه" : في بيته و عمله و اي مسؤولية هو فيها ..

لا بيفكر و لا بيحسبها و لا بيتشاور مع احد
، و لا بيحسب نتايج اللي بيقوله او بيعمله ..
ممكن يوقع عيلته او شغله او حتي خدمته بطقة من طقاته ..

فجأة الصبح - علي غيار الريق - قرار اهوج يقلب الدنيا
، و من غير اي مبررات او منطق..

ممكن كلمة او قرار يخرب البيت او العيلة ، او يوقع الناس في بعض ،
او يطير القرشين اللي معاك ، او يدمر العلاقة باللي حواليك ..

و تلاقي ان فيه نوعين من الناس دول : ابو "طقة و ندمان عليها "
، و ده ممكن يتعالج ..

لكن نوع ابو "طقة و مش ندمان عليها" ، هو المشكلة
، لانه شايف انه فوق الغلط ، و ان ربنا فوق و هو تحت ، و انه العالم ببواطن الامور ، و ان العيب في الناس اللي ما وصلتش لحكمة تفكيره و ذكائه المفرط و براعته غير المسبوقة!!

نوع ما بيفوقش غير بالصدمات و الكوارث،
و غالبا بعد فوات الأوان ، بكل اسف ..

نوع تعب الناس ، و حله بس عند رب الناس !!