منتدى الفرح المسيحى - شكرا لأحلي شخص في حياتي (يسوع الملك)

https://upload.chjoy.com/uploads/163951926149521.jpg

شكرا لانك مش زينا ،
شكرا لانك بتصبر علينا صبر غير متناهي ،
لدرجة اني لما بقع مرات اقول كدة كتير أوي و أكيد مش هتصبر علي تاني
بتفاجئني بصبرك اللي كله حب مش زهق
و تقول بجمالك العظيم " فتيلة مدخنة لا أطفئ " لسه فيه حتة فيها أمل .
شكرا لانك صديق معزي ألزق من الأخ ، لما بكون ماشي لوحدي بحس بحضورك القوي معايا
وصوتك الحلو جوايا " أنا معاك متخافش انت مش لوحدك "
و بحس و كأن معايا عزوة مش بحس بأي وحدة .
شكرا لإنك مشجع جدا بتدي بدل الفرصة مليون و بتقول مش مهم قوم و كمل تاني
، لسه مصمم عليك رغم أي نكران يلا إخدم و إرعي غنمي .
شكرا لإنك إيجابي و بتستثمر حتي في أوجاعي و ضعفاتي ،
تشوف وجعي وضعفي فتحط عليه نعمتك و تقول هحول وجعك وجرحك
ده لخدمة حلوة تفيدك و تفيد الناس .
ليا طلب المرة دي مش شكر ، نفسنا نرد جزء بسيط من جمالك
و جمايلك العظيمة دي بإننا نعيش حياة تليق بإسمك و مجدك بس انت عارف إناء جسدنا الضعيف
والهش و اللي بيتأثر قصاد اي خطية او اغراء او اغواء قوينا بنعمة تكمل كل نقص
علشان نعيش حياة سماوية تليق بأبناء الملكوت .
شكرا لأحلي شخص في حياتي (يسوع الملك)