منتدى الفرح المسيحى

https://upload.chjoy.com/uploads/163951284200411.jpg

إدعاء الفقر مش بس في الفلوس
فيه ناس بتدعي الفقر في امور معنوية كتير
و بيكون إدعاء الفقر هو اسلوب حياة بالنسبالهم

فيه ناس مثلا بتدعي الفقر في الجواز
بيكون ربنا اداهم جواز يساعدهم و يسندهم
وتلاقيهم بيتكلموا عن الجواز بصورة سلبية
سواء جد او سخرية و يتكلموا بس عن سلبياته
وينصحوا الناس بعدم الجواز .

فيه ناس بتدعي الفقر في السعادة
يكون ربنا باسطهم في حياتهم و موسع ومسهل عليهم امور كتير ، و رغم كدة كل اما تقابلهم تلاقي لسان حالهم متذمر ، وتسألهم عاملين ايه ؟ يقولولك "زفت" و يسودوا الحياة في عينك .

في ناس بتدعي الفقر في التشجيع
دول عندهم حاجات كتير يشجعوا بيها غيرهم ، و يعلموهم حاجات كتير في الحياة تنفعهم ، ورغم كدة متاخدش منهم غير احباط في الحياة ، وان الحياة حاطة عليهم ، او تلاقيهم صامتين وبخلاء جدا انهم يطلعوا معلومة ينفعوا بيها غيرهم .

للاسف كل النوعيات دي عندهم اعتقاد انك لما تتكلم عن إيجابياتك و احسانات ربنا معاك هيتحسدوا والنعمة هتزول منهم ، فيروحوا متكلمين بالسلب ظنا ان كدة هيجلب عليهم مزيد من النعم ، للاسف النوع ده بيدمر اللي حواليه لانهم للاسف طول الوقت بيصدروا للي حواليهم إحباط و تذمر ، و سودوية ، و فقر ، خوف ، و شك في صلاح الله .

لكن الانجيل بيقول حاجة غير كدة خالص :
" ارْجعْ إِلَى بَيْتِكَ وَحَدِّثْ بِكَمْ صَنَعَ اللهُ بِكَ " لوقا ٨

يعني شجع الناس دايما باللي ربنا بيعمله معاك ..
علشان تكون سبب طمأنينة و تشجيع للناس .

علشان كدة اوعي تكون من الناس اللي بتدعي الفقر .