منتدى الفرح المسيحى - صراخى ودبدبتى الطفوليه قدامه

https://upload.chjoy.com/uploads/163932365772981.jpg

الخوف ابو عياط مبيهداش ..وشحتفه..
.وصراخ بيرن عارفه انه مبقاش يناسبك ..لا سنك ولا برستيجك هيسمحولك تعملى كده😄
بس فى الحقيقه انا شخصيا بافتقد الانسيابيه
دى فى التعبير عن خوفى.. .اوقات بيكون لا فيا طاقه ولا احتمال للكتم..والتصنع
..والتظاهر بالتماسك وانا من جوايا قلبى مش فى مكانه..
بس مضطره لسنى ..ولطبيعة وضعى
انا ماما..وقدام ابنى ماما مبتخافش😀
وانا صغيره كنت فاكره ان كل ماهكبر هبطل اخاف ..
هبطل اطلب حد كبير ..وحقيقى كنت شايفه دى افضل تحقيق امنيه هستنى اكبر عشانها .
بس كبرت وطلعت الضلمه ..وخيالات الديناصورات اللى هتهجم علينا ..وامتحانات الحساب😁 ... كل ده مقدور عليه
و كبرت وعرفت قيمة كلمه"متخافش"
فى كل مره المسيح كان بيقولها لناس كبار وفى اوضاع مسئوله شبهنا.. من ضمنهم راجل كُباره منصب
..وتقيل فى المستوى اسمه " يايرس"
يايرس اللى لخص مفرمة خوفه كلها فى جملة
«ابْنَتِي الصَّغِيرَةُ عَلَى آخِرِ نَسَمَةٍ. لَيْتَكَ تَأْتِي وَتَضَعُ يَدَكَ عَلَيْهَا لِتُشْفَى فَتَحْيَا!»...قدام الناس قمة الثبات الظاهرى
بس الحقيقى محدش عرف يقرا دوبان قلبه ..غير المسيح.
هو بس اللى عرف يحضن قلبه ...فى كلمه "متخافش"
كبرت وعرفت قيمة كل انسان كان قادر يهدينى ويسمع ويقدر صراخى الاهبل ويدينى راحه ان اقول خايفه
كبرت وعرفت قيمه كلمه"انا خايفه"بصوت عالى
..وقيمه خروجها بره انها تبقى مجرد مشاعر
وكبرت وعرفت قيمة رخية الجسم وسكون نبضات قلبى بعد هجمات وزابع خوف امتلكنى
بس كمان كبرت وعرفت وادركت ..ان مازالت امتلك "بابا "اللى لا عمر ولا وظروف ولامسئوليات .يحرمونى من صراخى ودبدبتى الطفوليه قدامه