منتدى الفرح المسيحى - لحد ما اجي اسندني و شددني

https://upload.chjoy.com/uploads/163860432746021.jpg

أكتر سؤال بسأله لربنا و بيسأله كتير من المتألمين اللي زيي :
" ليه حياتي مكانتش تمشي سهلة زي ناس كتير حوالينا "

حتي لو مش حياتي كلها ، تبقي بعض التفاصيل الكبيرة :
ليه بعد ما اتخرجت من الكلية تعبت اوي علي ما اشتغلت ،
ما فيه ناس حواليا مش قليلين دنيتهم مشيت سهلة .

ليه اتعرض لفقدان اصدقاء ليا
ما فيه ناس حواليا اصدقائهم زي ما هما .

ليه ادوق مرار الفراق
ما فيه كتير شايفهم بعينيا دنيتهم مشيت سلسة
و ماداقوش مرار الخبرة دي .

أنا عارف يارب
قد ايه الاحداث المؤلمة دي شكلت جوايا دروس و نضج و نمو كبير لدرجة ان لما حد بيقابلني يقول لي انت فكرك أكبر من سنك لكن مش دايما ببص من الزاوية دي ، اوقات غصب عني بتحصر في دايرة الألم الضيقة و كمشاعر إنسانية بتصعب علي نفسي .

و قبل ما الموضوع يتحول اني اقعد ارثي في حالي ،
بقوم بسرعة ارنم و اشكر علي كل النعم و الهبات اللي عندي و بكمل شغلي و رسالتي ، بس حقيقي يارب مهما قريت من كتب عن فلسفة الألم و مهما طلعت بفلسفات واستنتاجات عن الألم هيفضل فيه جزء مش لاقي له إجابة .

رجائي دايما يا أبويا السماوي
إني لما أوصل عندك السما الاقي إجابة تستاهل كل الألم ده .

بس لحد ما اجي اسندني و شددني
علشان الألم ميخبطنيش زي الموج العنيد و يسحبني زي الدوامة العنيفة لمناطق برة مشيئتك و رعايتك و حضورك .